آئی ایم ایف کی بجلی شعبے کیلئے 830 ارب روپے سبسڈی کی اجازت، جنوری 2027 میں نرخ بڑھانے کی شرط عائد

4 اپریل, 20264 اپریل, 2026

Read Time:1 Minute, 37 Second

اسلام آباد، یورپ ٹوڈے: انٹرنیشنل مانیٹری فنڈ (آئی ایم ایف) نے پاکستان کو مالی سال 2026-27 کے بجٹ میں بجلی کے شعبے کے لیے 830 ارب روپے کی سبسڈی دینے کی اجازت دے دی ہے، تاہم اس کے ساتھ جنوری 2027 میں بجلی کی قیمتوں میں اضافے کی نئی شرط بھی عائد کر دی گئی ہے۔

ذرائع کے مطابق اس سبسڈی میں سے تقریباً 300 ارب روپے بجلی چوری اور بلوں کی کم وصولی سے ہونے والے نقصانات کے ازالے کے لیے مختص کیے گئے ہیں۔ آئی ایم ایف نے واضح کیا ہے کہ آئندہ سال جنوری میں سالانہ ٹیرف ایڈجسٹمنٹ کے تحت بجلی کے نرخوں میں اضافہ کیا جائے گا، جس میں عالمی توانائی منڈی، خصوصاً مشرقِ وسطیٰ کی کشیدگی کے اثرات بھی شامل ہوں گے۔

حکومت نے آئی ایم ایف کو یقین دہانی کرائی ہے کہ بجلی کے نرخوں میں بروقت ردوبدل کے ذریعے لاگت کی مکمل وصولی یقینی بنائی جائے گی، جبکہ مختلف صارفین پر اس کا بوجھ متوازن انداز میں تقسیم کیا جائے گا۔ ذرائع کا کہنا ہے کہ 830 ارب روپے کی منظوری حکومت کی طلب سے تقریباً 16 فیصد کم ہے۔

منظور شدہ سبسڈی میں ٹیرف ڈیفرنس، سابق فاٹا کے واجبات، زرعی ٹیوب ویلز، اور سرکلر ڈیٹ کی ادائیگیاں شامل ہیں۔ تاہم ماہرین کے مطابق ماضی میں نرخوں میں اضافے کے باوجود سرکلر ڈیٹ میں خاطر خواہ کمی نہ آنا اصلاحاتی پروگرام کی کمزوری کو ظاہر کرتا ہے۔

دوسری جانب آئی ایم ایف نے پیٹرول اور ڈیزل پر سبسڈی دینے کی اجازت نہیں دی، حالانکہ عالمی سطح پر ایندھن کی قیمتوں میں اضافہ ہو رہا ہے، جسے ماہرین پالیسی تضاد قرار دے رہے ہیں۔

حکومت نے آزاد بجلی پیدا کرنے والے اداروں کے ساتھ واجبات کے معاملات جون 2026 تک حل کرنے اور کے الیکٹرک کے ساتھ جاری تنازع دسمبر 2026 تک نمٹانے کا وعدہ بھی کیا ہے، جبکہ توانائی شعبے میں مالی استحکام کے لیے اصلاحات جاری رکھنے کا عزم ظاہر کیا گیا ہے۔