جمہوریہ اسلامی ایران کے سفارتخانے کی سیستان میں آٹھ پاکستانی شہریوں پر مسلح حملے کی شدید مذمت

اسلام آباد، یورپ ٹوڈے: جمہوریہ اسلامی ایران کے سفارتخانے نے ایران کے صوبہ سیستان میں آٹھ پاکستانی شہریوں کے خلاف ہونے والے غیر انسانی اور بزدلانہ مسلح حملے کی شدید مذمت کی ہے۔

سفارتخانے کی جانب سے جاری بیان میں کہا گیا ہے کہ دہشتگردی ایک دیرینہ آفت اور پورے خطے کے لیے مشترکہ خطرہ ہے، جس کے ذریعے غدار عناصر بین الاقوامی دہشتگردی کے ساتھ گٹھ جوڑ کرتے ہوئے خطے کے امن و استحکام کو نشانہ بناتے ہیں۔

بیان میں مزید کہا گیا ہے کہ اس منحوس اور تباہ کن رجحان کا مؤثر مقابلہ کرنے کے لیے تمام ممالک کی مشترکہ اور اجتماعی کوششیں ناگزیر ہیں، تاکہ ہر قسم کی دہشتگردی اور انتہاپسندی کو جڑ سے ختم کیا جا سکے، جنہوں نے گزشتہ دہائیوں میں ہزاروں بے گناہ جانوں کا ناحق خون بہایا ہے۔

سفارتخانے نے واقعے میں جاں بحق ہونے والے پاکستانی شہریوں کے اہلِ خانہ سے دلی ہمدردی اور تعزیت کا اظہار کرتے ہوئے اس بات پر زور دیا کہ ایران اس افسوسناک واقعے کی مکمل اور غیر جانبدارانہ تحقیقات کرے گا اور ذمہ داران کو انصاف کے کٹہرے میں لانے کے لیے ہر ممکن اقدام اٹھائے گا۔