نوشکی میں قومی شاہراہ پر دھماکہ، 3 اہلکار اور 2 شہری شہید

کوئٹہ ، یورپ ٹوڈے: بلوچستان کے ضلع نوشکی میں قومی شاہراہ این 40 پر ایف سی کے قافلے پر کالعدم تنظیم بی ایل اے کے خودکش اور بارودی دھماکے میں تین سیکیورٹی اہلکار اور دو شہری شہید ہوگئے۔

سیکیورٹی ذرائع کے مطابق سیکیورٹی فورسز نے حملہ آور دہشت گردوں کے خلاف فوری اور مؤثر جوابی کارروائی کی، جس کے نتیجے میں خود کش حملہ آور سمیت تین مزید دہشت گرد ہلاک ہوگئے۔

ہسپتالوں میں ایمرجنسی نافذ

بزدلانہ خود کش حملے کے بعد نوشکی کے تمام ہسپتالوں میں ایمرجنسی نافذ کر دی گئی، جبکہ زخمیوں کو فوری طبی امداد فراہم کرنے کے لیے اقدامات کیے گئے۔

سیکیورٹی فورسز کی کارروائی جاری

سیکیورٹی فورسز نے حملے کے بعد علاقے کو گھیرے میں لے کر کلیئرنس آپریشن شروع کر دیا ہے۔ ذرائع کے مطابق دہشت گردوں کے فرار کے تمام راستے بند کر دیے گئے ہیں، اور آخری دہشت گرد کے خاتمے تک آپریشن جاری رہے گا۔

وزیراعظم کی مذمت

وزیراعظم محمد شہباز شریف نے نوشکی میں بم دھماکے کی شدید مذمت کرتے ہوئے قیمتی جانوں کے نقصان پر اظہار افسوس کیا ہے۔ انہوں نے شہداء کے درجات کی بلندی اور ان کے لواحقین سے اظہار تعزیت کیا، جبکہ زخمیوں کو بہترین طبی سہولیات فراہم کرنے کی ہدایت بھی دی۔ وزیراعظم نے کہا کہ اس طرح کی بزدلانہ کارروائیاں دہشت گردی کے خلاف ہمارے عزم کو متزلزل نہیں کر سکتیں۔

وزیر داخلہ محسن نقوی کا ردعمل

وفاقی وزیر داخلہ محسن نقوی نے بھی واقعے کی مذمت کرتے ہوئے جاں بحق افراد کے اہل خانہ سے دلی ہمدردی اور اظہار تعزیت کیا۔ انہوں نے کہا کہ معصوم لوگوں کو نشانہ بنانا سفاکیت کی انتہا ہے اور ملک دشمن عناصر وطن عزیز میں عدم استحکام پیدا کرنے کی سازش کر رہے ہیں، تاہم قوم کے پختہ عزم کو کمزور نہیں کیا جا سکتا۔

ترجمان بلوچستان حکومت کا بیان

ترجمان بلوچستان حکومت شاہد رند نے بھی دھماکے کی مذمت کرتے ہوئے کہا کہ دشمن عناصر ملک میں بدامنی پھیلانے کی مذموم کوششیں کر رہے ہیں، لیکن دہشت گردی کے ذریعے عوام کے حوصلے پست نہیں کیے جا سکتے۔

وزیر اعلیٰ بلوچستان کا سخت مؤقف

وزیر اعلیٰ بلوچستان میر سرفراز بگٹی نے دھماکے کی مذمت کرتے ہوئے کہا کہ صوبے کے امن سے کھیلنے والوں کو عبرت ناک انجام تک پہنچایا جائے گا۔ انہوں نے کہا کہ بلوچستان میں دہشت گردوں کے لیے کوئی جگہ نہیں اور ہر قیمت پر امن قائم کیا جائے گا۔ ان کا کہنا تھا کہ دہشت گردوں کو ان کے انجام تک پہنچا کر دم لیں گے اور یہ جنگ آخری دہشت گرد کے خاتمے تک جاری رہے گی۔ وزیر اعلیٰ نے مزید کہا کہ بلوچستان کا ہر فرد شہداء کے خون کا مقروض ہے اور ریاست دشمن عناصر کے ناپاک عزائم خاک میں ملا دے گی۔