وزارت خزانہ نے قومی بچت اسکیموں کے منافع میں کمی کا اعلان کردیا

اسلام آباد، یورپ ٹوڈے: وفاقی وزارت خزانہ نے قومی بچت اسکیموں کی مختلف اسکیموں پر منافع کی شرح میں کمی کردی ہے، جس کا باقاعدہ نوٹیفکیشن جاری کردیا گیا ہے۔ اس نوٹیفکیشن کے مطابق سیونگ، اسپیشل سیونگ اکاؤنٹ، اور ڈیفنس سیونگ اسکیمز کے منافع کی شرح میں کمی کی گئی ہے، جبکہ ریگولر انکم سرٹیفکیٹ اور بہبود سیونگ سرٹیفکیٹ پر بھی پہلے سے کم منافع فراہم کیا جائے گا۔

وزارت خزانہ نے پنشنرز اور شہدا فیملی ویلفیئر اکاؤنٹس کے سالانہ منافع میں بھی کمی کی تصدیق کی ہے۔ نوٹیفکیشن کے مطابق، پنشنرز بینیفٹ اور شہدا فیملی ویلفیئر اکاؤنٹس کا منافع 15.36 فیصد سے کم کرکے 14.16 فیصد مقرر کیا گیا ہے، جبکہ بہبود سیونگ سرٹیفکیٹ کا سالانہ منافع بھی 14.16 فیصد کردیا گیا ہے اور ریگولر انکم سرٹیفکیٹ کا منافع 14.52 فیصد سے کم کرکے 12.72 فیصد کردیا گیا ہے۔

نئی شرح منافع کا اطلاق 25 ستمبر 2024 سے ہوگا۔