ڈرون حملے کے خدشے کے پیشِ نظر ماسکو کے چار ہوائی اڈوں پر پروازیں محدود

ماسکو،یورپ ٹوڈے: روسی دارالحکومت ماسکو پر ڈرون حملے کے تناظر میں سیکیورٹی وجوہات کی بنا پر چار ہوائی اڈوں پر پروازوں کی آمد و رفت عارضی طور پر محدود کر دی گئی ہے۔

روسی ایوی ایشن ریگولیٹر روزاویاتسیا کے مطابق اتوار کے روز حفاظتی اقدامات کے تحت یہ پابندیاں عائد کی گئیں تاکہ فضائی حدود کے تحفظ کو یقینی بنایا جا سکے۔

دوسری جانب ماسکو کے میئر سرگئی سوبیانین نے بتایا کہ ماسکو کی جانب آنے والے کم از کم سات ڈرون مار گرائے گئے۔ میڈیا رپورٹس کے مطابق متعلقہ ادارے صورتحال پر کڑی نظر رکھے ہوئے ہیں اور دارالحکومت کی سیکیورٹی مزید سخت کر دی گئی ہے۔

حکام کا کہنا ہے کہ پروازوں کی بحالی کا فیصلہ حالات کے مکمل جائزے کے بعد کیا جائے گا۔