غریب اور متوسط طبقے کو مزید ریلیف فراہم کرنے کے لیے حکومت پرعزم، وزیراعظم شہباز شریف

Read Time:2 Minute, 19 Second

اسلام آباد، یورپ ٹوڈے: وزیرِاعظم محمد شہباز شریف نے پیر کے روز کہا ہے کہ حکومت غریب اور متوسط آمدنی والے طبقے کو مزید ریلیف فراہم کرنے کے لیے ہر ممکن اقدامات کر رہی ہے اور مشکل حالات میں انہیں تنہا نہیں چھوڑا جائے گا۔

وزیرِاعظم نے مشرقِ وسطیٰ کی صورتحال کے پیٹرولیم مصنوعات پر اثرات، موجودہ ذخائر کی دستیابی اور عوامی ریلیف اقدامات کے جائزہ اجلاس کی صدارت کرتے ہوئے کہا کہ ڈیجیٹل نظام کے ذریعے ریلیف براہِ راست عام آدمی تک پہنچایا جائے گا۔

انہوں نے کہا کہ حکومتی اخراجات اور ترقیاتی بجٹ میں نمایاں کمی کی گئی ہے جبکہ کفایت شعاری مہم کے تحت 60 فیصد سرکاری گاڑیاں بند کر دی گئی ہیں تاکہ بچت کا عمل اندر سے شروع کیا جا سکے۔

وزیرِاعظم نے بتایا کہ پیٹرولیم مصنوعات کی قیمتوں میں اضافے کی تجاویز کو بارہا مسترد کیا گیا اور کفایت شعاری سے بچائی گئی رقم عوامی ریلیف پر خرچ کی جا رہی ہے۔ ان کا کہنا تھا کہ بروقت فیصلوں کی بدولت عالمی بحران کے باوجود ایندھن کی فراہمی میں تعطل پیدا نہیں ہونے دیا گیا۔

انہوں نے اجلاس کے شرکاء کو آگاہ کیا کہ پاکستان خطے میں امن کی بحالی کے لیے بھرپور سفارتی کوششیں جاری رکھے ہوئے ہے۔

اجلاس میں شرکاء کو ایندھن کی بچت سے متعلق حکومتی اقدامات پر عملدرآمد، آئندہ کے لائحہ عمل اور موجودہ ذخائر کی صورتحال پر تفصیلی بریفنگ دی گئی۔ بتایا گیا کہ صوبائی حکومتوں کے ساتھ مل کر موٹر سائیکلوں اور رکشوں کی رجسٹریشن کے عمل کو تیز کیا جا رہا ہے تاکہ انہیں فوری ریلیف فراہم کیا جا سکے۔

اجلاس میں انٹیلی جنس بیورو کی آڈٹ رپورٹ بھی پیش کی گئی جس میں وزیرِاعظم کی کفایت شعاری مہم پر عملدرآمد کا جائزہ لیا گیا۔ شرکاء کو بتایا گیا کہ سادگی اور بچت کی مہم پر سختی سے عمل یقینی بنایا جا رہا ہے۔

اجلاس کو یہ بھی بتایا گیا کہ ملک کی ضروریات پوری کرنے کے لیے ایندھن کے وافر ذخائر موجود ہیں اور مستقبل کے لیے بھی انتظامات کیے جا رہے ہیں۔ لگژری گاڑیوں میں استعمال ہونے والے ہائی آکٹین ایندھن پر لیوی میں اضافے کے باوجود جیٹ فیول کی قیمتوں کو برقرار رکھا گیا ہے۔

مزید بتایا گیا کہ ملک میں ادویات کے بھی وافر ذخائر دستیاب ہیں جبکہ آئندہ کے اقدامات سے متعلق تجاویز بھی اجلاس میں پیش کی گئیں۔

اجلاس میں نائب وزیرِاعظم و وزیرِ خارجہ محمد اسحاق ڈار، وفاقی وزراء خواجہ محمد آصف، احسن اقبال، ڈاکٹر مصدق ملک، احد خان چیمہ، سید مصطفیٰ کمال، محمد اورنگزیب، عطاء اللہ تارڑ، علی پرویز ملک، شزا فاطمہ خواجہ، رانا مبشر اقبال، سردار اویس خان لغاری، مشیرِ وزیرِاعظم رانا ثناء اللہ، وزیرِ مملکت بلال اظہر کیانی، معاونینِ خصوصی طارق فاطمی اور طلحہ برکی سمیت اراکینِ قومی اسمبلی اور اعلیٰ حکام نے شرکت کی۔