حلقۂ اربابِ ذوق راولپنڈی کا ادبی اجلاس— غزل و مضمون کی عمدہ پیشکشوں نے محفل کو رنگین کر دیا

راولپنڈی، یورپ ٹوڈے: حلقۂ اربابِ ذوق راولپنڈی کا ہفتہ وار ادبی اجلاس بروز اتوار زیرِ صدارت پروفیسر جلیل عالی منعقد ہوا، جس میں شعری و فکری تخلیقات نے محفل کو معنوی طور پر نکھار بخشا۔ اجلاس میں غزل اور مضمون کے موضوعات پر خوبصورت، اثر انگیز اور معیاری ادبی کاوشیں پیش کی گئیں۔

غزل کے حصے میں شفیق ساحل نے اپنی اردو غزل پیش کی، جسے حاضرینِ محفل کی جانب سے بھرپور داد و تحسین ملی۔ اسی طرح معظمہ تنویر نے "تصوف میں جدیدیت کی ضرورت و اہمیت” کے عنوان سے اپنا مضمون پیش کیا، جسے فکری پختگی، علمی استدلال اور جدید تناظر کے باعث شرکا نے بے حد سراہا۔

اجلاس میں شریک نمایاں شخصیات میں جلیل عالی، شفیق ساحل، معظمہ تنویر، احمد رضا راجا، اتفاق بٹ، جہانگیر عمران، محمد ظہیر الدین خان، انصر فاروق، محمد سعید اللہ، وقاص عزیز، اکرم نازی، شاہد حسن، راحت احمد خان، شہلا نصیب، فراز امتیاز، نوید اسلم کہوٹ، عامر ڈھڈی، فیصل شہزاد، ناصر علی ناصر، یوشع سیف، مظہر شہزاد خان، یاسمین کنول، محمد عمر اور ذیشان جدون شامل تھے۔