جنگلی حیات کے تحفظ کے لیے پنجاب حکومت کے تاریخی اقدامات جاری ہیں: وزیر اعلیٰ پنجاب مریم نوازشریف

Read Time:1 Minute, 57 Second

لاہور،یورپ ٹوڈے: وزیر اعلیٰ پنجاب مریم نواز شریف نے کہا ہے کہ جنگلی حیات آئندہ نسلوں کے لیے ایک قیمتی اثاثہ ہے اور اس کا تحفظ اور بقا حیاتیاتی تنوع اور ماحولیاتی توازن برقرار رکھنے کے لیے ہم سب کی مشترکہ ذمہ داری ہے۔

عالمی یومِ جنگلی حیات کے موقع پر اپنے خصوصی پیغام میں وزیر اعلیٰ پنجاب نے کہا کہ جنگلی حیات قدرتی ماحولیاتی نظام کو برقرار رکھنے کے لیے ناگزیر ہے۔ انہوں نے اس امر پر اطمینان کا اظہار کیا کہ صوبائی حکومت نے جنگلی حیات کے تحفظ، بقا اور فروغ کے لیے تاریخی اقدامات کیے ہیں۔

انہوں نے کہا کہ پنجاب حکومت نے غیر قانونی شکار اور جنگلی جانوروں کی غیر قانونی ملکیت کی روک تھام کے لیے پنجاب وائلڈ لائف ایکٹ 1974 اور پروٹیکٹڈ ایریاز ایکٹ میں ترامیم کے ذریعے مؤثر اصلاحات متعارف کرائی ہیں۔

عوام کی سہولت اور خلاف ورزیوں پر فوری کارروائی کو یقینی بنانے کے لیے صوبہ بھر میں وائلڈ لائف ہیلپ لائن 1107 کو مکمل طور پر فعال کر دیا گیا ہے۔

وزیر اعلیٰ نے بتایا کہ جدید ڈیجیٹل نظام کے تحت شوٹنگ لائسنس، درآمد و برآمد پرمٹس، شکار کے اجازت ناموں اور بریڈنگ فارمز کی رجسٹریشن کے لیے آن لائن سہولیات متعارف کرائی گئی ہیں۔

انہوں نے کہا کہ پنجاب میں پہلی مرتبہ مصنوعی ذہانت (AI) پر مبنی جانوروں کی مردم شماری کا نظام متعارف کرایا گیا ہے تاکہ جنگلی حیات سے متعلق درست ڈیٹا اکٹھا کیا جا سکے اور مؤثر انتظام ممکن بنایا جا سکے۔ اس کے علاوہ ریسکیو کیے گئے جانوروں کی نگرانی اور حفاظت کے لیے جی پی ایس اور کالر ٹریکنگ سسٹم بھی متعارف کرایا گیا ہے۔

مریم نواز نے کہا کہ عوامی آگاہی اور سیاحت کے فروغ کے لیے جدید سہولیات بھی فراہم کی جا رہی ہیں۔ لاہور سفاری زو میں تھری ڈی اسکرین، جانوروں کے مجسمے اور دیگر سہولیات نصب کی گئی ہیں جبکہ 7D وائلڈ لائف سنیما کی تعمیر آخری مراحل میں ہے۔

انہوں نے بتایا کہ پنجاب کے پہلے وائلڈ لائف اسپتال کی تعمیر 80 فیصد مکمل ہو چکی ہے جہاں مختلف اقسام کے جانوروں کے علاج کے لیے ماہر ویٹرنری ڈاکٹروں کو تعینات کیا جائے گا۔

وزیر اعلیٰ پنجاب نے اعلان کیا کہ شہریوں کو ڈیجیٹل پلیٹ فارمز کے ذریعے گھروں بیٹھے جنگلی حیات کا مشاہدہ کرنے کی سہولت دینے کے لیے 360 ڈگری ورچوئل زو بھی قائم کیا جائے گا۔