وزیراعظم شہباز شریف اور آئی ایم ایف کی مینیجنگ ڈائریکٹر کرسٹالینا جارجیوا کی ملاقات مفید رہی، نئے فنڈ پروگرام پر تبادلہ خیال

نیویارک، یورپ ٹوڈے: انٹرنیشنل مانیٹرنگ فنڈ (آئی ایم ایف) کی مینیجنگ ڈائریکٹر کرسٹالینا جارجیوا نے وزیراعظم پاکستان شہباز شریف کے ساتھ ملاقات کو مفید قرار دیا ہے۔

اپنے بیان میں کرسٹالینا جارجیوا نے کہا کہ ملاقات کے دوران پاکستان کے لیے نئے فنڈ کی معاونت سے چلنے والے پروگرام پر بات چیت ہوئی، جس کا مقصد ملک میں مہنگائی میں کمی لانا ہے۔ انہوں نے کہا کہ یہ پروگرام ٹیکس کے نظام میں بہتری لانے اور نئی ملازمتوں کے مواقع پیدا کرنے میں مددگار ثابت ہوگا۔

آئی ایم ایف کی مینیجنگ ڈائریکٹر نے کہا کہ یہ فنڈ پروگرام جامع ترقی کے فروغ کے لیے اہم کردار ادا کرے گا۔

وزیراعظم آفس کے میڈیا ونگ کے مطابق، اقوام متحدہ کی جنرل اسمبلی کے موقع پر جمعرات کو نیویارک میں وزیراعظم شہباز شریف اور آئی ایم ایف کی مینیجنگ ڈائریکٹر کے درمیان ملاقات ہوئی تھی۔

مزید برآں، گزشتہ روز آئی ایم ایف بورڈ اجلاس کے بعد جیو نیوز سے بات کرتے ہوئے کرسٹالینا جارجیوا نے پاکستانی حکومت اور عوام کو مبارکباد دیتے ہوئے کہا کہ حکومت پاکستان امیروں سے ٹیکس وصول کر کے غریب طبقے کی مدد کر رہی ہے۔