انڈونیشیا کا مستقبل قابل تجدید توانائی، خصوصاً شمسی توانائی سے وابستہ ہے: صدر پرابوو
جکارتہ: انڈونیشیا کے صدر پرابوو سبیانتو نے کہا ہے کہ اگرچہ ملک میں تیل اور گیس کے وافر ذخائر موجود ہیں، تاہم انڈونیشیا کا مستقبل نئی اور قابل تجدید توانائی، خاص طور پر شمسی توانائی، سے وابستہ ہے۔
جمعرات کے روز 15 صوبوں میں جیوتھرم اور شمسی توانائی کے بجلی گھروں کی بیک وقت افتتاحی تقریب سے خطاب کرتے ہوئے صدر پرابوو نے کہا: “ہمارے پاس تیل اور گیس کے بڑے ذخائر موجود ہیں اور دستیاب ٹیکنالوجی سے ہم فوری طور پر ان سے فائدہ اٹھا سکتے ہیں، لیکن قابل تجدید توانائی، بالخصوص شمسی توانائی، ہمارا مستقبل ہے۔”
صدر نے اس بات پر زور دیا کہ نئی اور قابل تجدید توانائی کے ذرائع انڈونیشیا کے دور دراز جزیروں اور دیہی علاقوں کو بھی بجلی کی فراہمی ممکن بنائیں گے۔
انہوں نے 15 صوبوں میں 55 نئے بجلی گھروں کی بیک وقت تنصیب کو انڈونیشیا کی توانائی میں خودکفالت کی جانب ایک اہم قدم قرار دیتے ہوئے کہا: “یہ ہمارے اس عزم کا ثبوت ہے کہ اب ہم توانائی کے شعبے میں اپنے پاؤں پر کھڑے ہو سکتے ہیں۔ یہ توانائی تمام انڈونیشی شہریوں کے لیے مؤثر اور اقتصادی انداز میں دستیاب ہوگی۔”
صدر پرابوو نے حکومتی اہلکاروں پر زور دیا کہ وہ توانائی کے شعبے میں ذمہ دارانہ، منظم اور عوامی مفاد پر مبنی انتظام یقینی بنائیں، تاکہ ملک کے صفر کاربن اخراج کے مشترکہ ہدف کو حاصل کیا جا سکے۔
انہوں نے کہا: “ہمارے پاس موقع ہے کہ ہم دنیا کے ان اولین ممالک میں شامل ہوں جو مقررہ وقت پر صفر کاربن اخراج کا ہدف حاصل کریں۔ تاہم سب سے اہم بات یہ ہے کہ ہم توانائی کو مؤثر انداز میں پیدا کر سکتے ہیں اور مہنگی لاجسٹک لاگت کو کم کر سکتے ہیں۔”
صدر نے کہا کہ اس ہدف کے حصول کے لیے حکومت نجی شعبے، بین الاقوامی شراکت داروں اور ریاستی و علاقائی اداروں سمیت تمام ہم خیال اسٹیک ہولڈرز کے ساتھ مل کر کام کرے گی۔
انہوں نے اس بات کا اعادہ کیا کہ حکومت نجی شعبے اور غیر ملکی شراکت داروں کے ساتھ مل کر مکمل مالی تخمینے کے ساتھ توانائی کے قومی خودکفالت پروگرام کو آگے بڑھائے گی۔
