رجیم چینج کی کوشش ہوئی تو اسرائیل کے دیمونا جوہری مرکز کو نشانہ بنائیں گے: ایران کا انتباہ

تہران، یورپ ٹوڈے: ایران نے خبردار کیا ہے کہ اگر اسرائیل اور امریکا نے اسلامی جمہوریہ ایران میں رجیم چینج کی کوشش کی تو اسرائیل کے جوہری مرکز دیمونا کو براہِ راست نشانہ بنایا جا سکتا ہے۔

غیر ملکی خبر رساں ادارے کے مطابق ایک نیم سرکاری ایرانی خبر ایجنسی کے حوالے سے بتایا گیا ہے کہ ایک اعلیٰ ایرانی فوجی عہدیدار نے کہا ہے کہ ایران کسی بھی بیرونی مداخلت یا حکومت گرانے کی سازش کا بھرپور اور فیصلہ کن جواب دے گا۔

ایرانی عہدیدار کا کہنا تھا کہ اگر ایسی صورتحال پیدا ہوتی ہے تو اسرائیل کا دیمونا نیوکلیئر ری ایکٹر ایران کے ممکنہ اہداف میں سرفہرست ہوگا۔

انہوں نے دعویٰ کیا کہ تہران کے پاس ایسے حساس اہداف کو نشانہ بنانے کی مکمل صلاحیت موجود ہے اور اگر ایران پر جنگ مسلط کی گئی تو اس کا دائرہ کار وسیع ہو سکتا ہے۔

بیان میں مزید کہا گیا کہ ایران اپنی خودمختاری، سلامتی اور نظام کے تحفظ کے لیے ہر ممکن اقدام اٹھانے کی صلاحیت رکھتا ہے اور کسی بھی جارحیت کا سخت جواب دیا جائے گا۔