صدر قاسم توقایف کی قیادت میں قازقستان–جاپان بزنس فورم میں 3.72 ارب ڈالر کے 60 سے زائد معاہدات پر دستخط

Read Time:1 Minute, 55 Second

ٹوکیو، یورپ ٹوڈے: قازقستان کے صدر قاسم جومارت توقایف نے جاپان کے دارالحکومت ٹوکیو میں منعقدہ وسطی ایشیا–جاپان بزنس فورم میں شرکت کی۔ میڈیا رپورٹس کے مطابق، اکوردا پریس سروس کے حوالے سے بتایا گیا ہے کہ اس اہم تقریب میں جاپانی وزیر اعظم سانائے تاکائیچی، کرغزستان کے صدر صدر صادیر جپاروف، تاجکستان کے صدر امام علی رحمان، ترکمانستان کے صدر سردار بردی محمدوف اور ازبکستان کے صدر شوکت مرزیایف نے بھی شرکت کی۔

بزنس فورم کے دوران سبز ترقی اور پائیداری، ڈیجیٹل تبدیلی اور باہمی رابطہ کاری، مالیات، افرادی وسائل، اور کاروبار کے لیے سماجی نظام کی ترقی جیسے موضوعات پر اجلاس منعقد کیے گئے۔ اس کے علاوہ وسطی ایشیا اور جاپان کی کاروباری برادریوں کے درمیان دوطرفہ ملاقاتیں بھی ہوئیں۔

صدر قاسم جومارت توقایف کے سرکاری دورۂ جاپان اور وسطی ایشیا–جاپان بزنس فورم کے بعد قازقستان اور جاپانی کاروباری اداروں کے درمیان 3.72 ارب امریکی ڈالر مالیت کے 60 سے زائد معاہدات اور دستاویزات پر دستخط کیے گئے۔

اس سے قبل صدر توقایف نے پہلے وسطی ایشیا–جاپان ڈائیلاگ سمٹ سے بھی خطاب کیا تھا۔ قازق صدر نے نشاندہی کی کہ جاپان کے دورے کے دوران 60 سے زائد دوطرفہ دستاویزات، جن میں 3.7 ارب امریکی ڈالر سے زائد مالیت کے تجارتی معاہدات شامل ہیں، طے پائے۔

صدر توقایف نے آکتاؤ سی پورٹ کی ترقی میں جاپان کی شمولیت کے فیصلے کا خیرمقدم کیا اور توانائی کے شعبے میں جاپانی جدت طرازی اور سرمایہ کاری، نیز جوہری فضلے کے انتظام کے میدان میں جاپانی منصوبوں میں دلچسپی کا اظہار کیا۔

انہوں نے بتایا کہ قازقستان اور جاپان نے نیکسٹ جنریشن اسمارٹ مائننگ پلس منصوبے کا آغاز کر دیا ہے، جس کا مقصد پیداواری عمل کو ڈیجیٹل بنانا ہے۔ صدر نے آستانہ میں “وسطی ایشیا–جاپان” سائنس دانوں کی کانفرنس منعقد کرنے کی تجویز پیش کی اور بحیرۂ ارال کے مسئلے کو بھی اجاگر کیا۔

صدر توقایف نے ٹوکیو انیشی ایٹو کے لیے آستانہ حب اور Alem.ai سینٹر کو پلیٹ فارم کے طور پر پیش کرنے کی پیشکش کی، جبکہ جاپانی جامعات کے نمائندہ دفاتر قازقستان میں کھولنے کی تجویز بھی دی۔ انہوں نے سیاحت کے شعبے میں جاپان کے ساتھ تعاون کے اہم شعبوں کی نشاندہی بھی کی۔

پہلے وسطی ایشیا–جاپان ڈائیلاگ سمٹ کے اختتام پر ٹوکیو ڈیکلریشن کو باضابطہ طور پر منظور کر لیا گیا۔