لبنان کی بگڑتی صورتحال پر اقوام متحدہ کے سیکرٹری جنرل کا اظہار تشویش، جنگ بندی کی اپیل

نیویارک، یورپ ٹوڈے: اقوام متحدہ کے سیکرٹری جنرل انتونیو گوتریس نے لبنان کی صورتحال کو تشویشناک قرار دیتے ہوئے کہا ہے کہ لبنان میں حملوں کے تبادلے کا دائرہ وسیع ہوتا جا رہا ہے اور حالات بدتر سے بدترین ہوتے جا رہے ہیں۔

سیکرٹری جنرل نے کہا کہ اسرائیل نے لبنان میں جنگ بندی کے لیے فرانس کی پیشکش کو مسترد کر دیا ہے، جس کے باعث خطے میں کشیدگی مزید بڑھنے کا خدشہ ہے۔

انتونیو گوتریس نے زور دیا کہ لبنان میں وسیع پیمانے پر جنگ سے بچنے کی ہر ممکن کوشش کی جانی چاہیے۔ انہوں نے ایرانی حملوں کو مسئلہ فلسطین کے حل کے لیے غیر سودمند قرار دیا اور کہا کہ ایسے اقدامات خطے میں امن کو مزید خراب کر سکتے ہیں۔

سیکرٹری جنرل نے غزہ میں فوری جنگ بندی اور لبنان میں شرانگیز حملے روکنے کی اپیل کی اور کہا کہ مسئلہ فلسطین کے دو ریاستی حل پر عمل درآمد کا وقت آ چکا ہے، تاکہ خطے میں دیرپا امن قائم ہو سکے۔