لیلا علیئیوا اور آرزوعلیئیوا کا دوست انکلوسیو ڈیولپمنٹ اینڈ کریئیٹیویٹی سینٹر کا دورہ
باکو، یورپ ٹوڈے: حیدر علیئیف فاؤنڈیشن کی نائب صدر اور آئی ڈی ای اے (IDEA) پبلک یونین کی بانی و سربراہ لیلا علیئیوا نے باکو میڈیا سینٹر کی سربراہ اَرزوعلیئیوا کے ہمراہ “ڈوست انکلوسیو ڈیولپمنٹ اینڈ کریئیٹیویٹی سینٹر” کا دورہ کیا، جہاں انہوں نے سماجی طور پر کمزور طبقات سے تعلق رکھنے والے افراد کی تخلیقی سرگرمیوں کا مشاہدہ کیا۔
یہ مرکز 2021 میں آذربائیجان کی خاتونِ اول اور ملک کی پہلی نائب صدر مہربان علیئیوا کی پہل پر قائم کیا گیا تھا اور اسے جنوبی قفقاز (South Caucasus) کا پہلا اور سب سے بڑا جامع تخلیقی ترقیاتی مرکز تسلیم کیا جاتا ہے۔
آذربائیجان کے وزیر محنت و سماجی تحفظِ آبادی، انار علیئیف نے معزز مہمانوں کو مرکز کی سرگرمیوں سے متعلق بریفنگ دی۔ انہوں نے بتایا کہ مرکز میں معذور افراد، شہداء کے اہلِ خانہ اور دیگر کمزور سماجی طبقات سے تعلق رکھنے والے افراد کے لیے تربیتی ورکشاپس، سماجی و نفسیاتی بحالی کی سہولیات فراہم کی جاتی ہیں۔
مرکز کے قیام سے اب تک یہاں 120 سے زائد تقریبات منعقد ہو چکی ہیں اور مرکزی مرکز کے ساتھ ساتھ اسماعیلی اور باردہ شہروں میں قائم “ڈوست ایوی” شاخوں کے ذریعے 700 سے زائد افراد ان سہولیات سے استفادہ کر چکے ہیں۔ اس وقت تقریباً 200 افراد ذاتی و پیشہ ورانہ صلاحیتوں کو فروغ دینے کے تربیتی پروگراموں میں شریک ہیں۔
وزیر محنت نے اس بات پر بھی روشنی ڈالی کہ مرکز سے وابستہ افراد کے تیار کردہ فن پارے بین الاقوامی نمائشوں میں پیش کیے جا چکے ہیں، جن میں خاص طور پر COP29 کی گرین زون میں قائم “آرٹ پویلین” شامل ہے، جہاں ان فن پاروں کو بھرپور پذیرائی ملی۔
لیلا علیئیوا اور اَرزوعلیئیوا نے مرکز کے مختلف حصوں کا دورہ کیا اور مٹی کے برتن سازی، قالین بافی، اور بصری فنون کی سرگرمیوں میں مصروف افراد سے ملاقات کی۔ اس موقع پر معذوری کے شکار ایک تربیت کار کی جانب سے تیار کردہ ایک خصوصی فن پارہ بھی پیش کیا گیا، جس کی تیاری میں روایتی ایریوان اور قرا باغ چلابی قالین کے ڈیزائن سے الہام لیا گیا تھا۔ یہ فن پارہ 5 مئی کو منائے جانے والے “قالین بافوں کے دن” کی مناسبت سے تیار کیا گیا تھا۔
دورے کے دوران مہمانوں نے 18 سال سے کم عمر معذور افراد کے لیے قائم سماجی خدماتی ادارے نمبر 2 سے تعلق رکھنے والے بچوں کی جانب سے پیش کیے گئے فنکارانہ مظاہرے اور مرکز کے تربیت کاروں و مستفیدین کی جانب سے پیش کیے گئے جامع موسیقی پروگرام سے بھی لطف اٹھایا۔
دورے کا اختتام مرکز کے احاطے میں پودا لگانے کی تقریب پر ہوا، جس میں آئی ڈی ای اے کے رضاکاروں نے بھی شرکت کی۔
