وزیرِاعظم شہباز شریف کی جانب سے سہ ملکی سیریز کی ٹیموں کے اعزاز میں ظہرانہ، پاکستان میں بین الاقوامی کرکٹ کی میزبانی کو امن و استحکام کا ثبوت قرار

اسلام آباد، یورپ ٹوڈے: وزیرِاعظم محمد شہباز شریف نے بدھ کے روز کہا ہے کہ پاکستان میں مسلسل بین الاقوامی کرکٹ ایونٹس کا انعقاد ملک کی مثبت ساکھ، قیامِ امن اور مکمل استحکام کا واضح ثبوت ہے۔

وزیرِاعظم نے پاکستان، سری لنکا اور زمبابوے کی کرکٹ ٹیموں کے اعزاز میں وزیرِاعظم ہاؤس میں خصوصی ظہرانے کا اہتمام کیا، جو سہ ملکی سیریز میں شرکت کر رہی ہیں۔

تقریب سے خطاب کرتے ہوئے وزیرِاعظم شہباز شریف نے کہا کہ تینوں ٹیموں نے جس جذبے، مہارت اور عزم کا مظاہرہ کیا ہے وہ قابلِ تحسین ہے۔ انہوں نے کہا کہ کھلاڑی نہ صرف اپنی اپنی قوموں کی بہترین نمائندگی کر رہے ہیں بلکہ نوجوان نسل کے لیے کھیل میں نظم و ضبط، اسپورٹس مین اسپرٹ اور باہمی احترام کی روشن مثال بھی قائم کر رہے ہیں۔ وزیرِاعظم نے امید ظاہر کی کہ ٹیمیں آئندہ میچز میں بھی اسی پیشہ ورانہ طرز عمل کو برقرار رکھیں گی۔

ظہرانے میں وزیراعلیٰ سندھ سید مراد علی شاہ، وفاقی وزیرِداخلہ و چیئرمین پی سی بی سید محسن رضا نقوی، وفاقی وزیرِ اطلاعات و نشریات عطااللہ تارڑ، وفاقی وزیرِ ریلوے محمد حنیف عباسی، سری لنکن ہائی کمشنر ریئر ایڈمرل فریڈ سینی ویراتنے اور زمبابوین ہائی کمشنر ٹائٹس ابو باسوتو سمیت اعلیٰ حکام نے شرکت کی۔

وزیرِاعظم نے پاکستان کرکٹ بورڈ کے چیئرمین محسن نقوی کی قیادت کو بھی سراہا اور کہا کہ ان کی سرپرستی میں پی سی بی نے پیشہ ورانہ معیار، مؤثر حکمت عملی اور بہترین انتظامات کے ساتھ سیریز کے تمام میچ کامیابی سے منعقد کیے۔

انہوں نے امید ظاہر کی کہ کرکٹ پاکستان، سری لنکا اور زمبابوے کے درمیان دوستی اور تعاون کے رشتوں کو مزید مضبوط کرے گی، اور اس عزم کا اعادہ کیا کہ پاکستان آئندہ بھی اسی جذبے کے ساتھ بین الاقوامی ٹیموں کی میزبانی جاری رکھے گا۔