عالمی تنازعات کے پرامن حل کے لیے پاکستان کی بڑی سفارتی کامیابی، سلامتی کونسل میں قرارداد 2788 (2025) متفقہ طور پر منظور
نیویارک، یورپ ٹوڈے: عالمی تنازعات کے پرامن حل کو فروغ دینے کے سلسلے میں پاکستان کو اقوام متحدہ میں ایک اہم سفارتی کامیابی حاصل ہوئی ہے، جہاں سلامتی کونسل نے پاکستان کی جانب سے پیش کردہ قرارداد 2788 (2025) کو متفقہ طور پر منظور کر لیا۔
یہ پیش رفت عالمی امن و سلامتی کے قیام میں پاکستان کے مؤثر اور فعال کردار کی غماز ہے۔ پاکستان کی طرف سے یہ قرارداد نائب وزیر اعظم و وزیر خارجہ اسحاق ڈار نے عالمی فورم پر پیش کی، جس کا عنوان تھا: “تنازعات کے پرامن حل کے لیے طریقہ کار کو مضبوط بنانا”۔
قرارداد میں واضح کیا گیا ہے کہ سفارت کاری، ثالثی، اعتماد سازی، اور بین الاقوامی و علاقائی مکالمے ہی تنازعات کے پائیدار حل کے لیے کلیدی ذرائع ہیں۔ اس ضمن میں سلامتی کونسل نے رکن ممالک پر زور دیا کہ وہ طاقت کے بجائے پرامن ذرائع کو ترجیح دیں اور اقوام متحدہ کی متعلقہ قراردادوں پر مؤثر عملدرآمد کو یقینی بنائیں۔
مزید برآں، قرارداد میں علاقائی اور ذیلی علاقائی تنظیموں سے اپیل کی گئی ہے کہ وہ پرامن حل کے لیے اپنی کوششوں میں تیزی لائیں اور اقوام متحدہ کے ساتھ قریبی تعاون کو فروغ دیں۔
پاکستان نے اس قرارداد کی متفقہ منظوری کو اقوام متحدہ میں اپنی ایک اہم سفارتی کامیابی قرار دیا ہے، جو نہ صرف پاکستان کے بین الاقوامی مؤقف کی تائید ہے بلکہ عالمی قیامِ امن کے لیے ایک مثبت اور مؤثر پیش رفت بھی ہے۔
