محسن نقوی کا کولمبو پہنچنے پر پرتپاک استقبال، کرکٹ تعاون پر اہم ملاقات

کولمبو، یورپ ٹوڈے: وفاقی وزیر داخلہ اور چیئرمین پاکستان کرکٹ بورڈ (پی سی بی) محسن نقوی سری لنکا کے دارالحکومت کولمبو پہنچ گئے، جہاں ان کا پرتپاک استقبال کیا گیا۔

ایئرپورٹ پر سری لنکا کے نائب وزیر برائے پورٹس و ایوی ایشن جنیتھیا راون کوڈ یتھوواکو نے معزز مہمان کا خیرمقدم کیا۔ اس موقع پر سری لنکا میں پاکستان کے ہائی کمشنر میجر جنرل (ر) فہیم العزیز بھی موجود تھے۔

کولمبو آمد کے بعد محسن نقوی کی سری لنکن وزیر سے ملاقات بھی ہوئی، جس میں باہمی دلچسپی کے امور اور کرکٹ کے میدان میں تعاون بڑھانے پر تفصیلی تبادلہ خیال کیا گیا۔ دونوں رہنماؤں نے کھیلوں کے ذریعے دوطرفہ تعلقات کو مزید مضبوط بنانے کے عزم کا اظہار کیا۔

سری لنکن وزیر نے محسن نقوی کو خوش آمدید کہتے ہوئے کہا کہ آپ کی سری لنکا آمد ہمارے لیے باعثِ مسرت ہے اور یہ دورہ دونوں ممالک کے درمیان تعلقات کو مزید فروغ دینے میں معاون ثابت ہوگا۔

واضح رہے کہ سری لنکا میں کل بروز اتوار 15 فروری کو ایک اہم اور ہائی وولٹیج مقابلہ متوقع ہے، جس کے لیے قومی کرکٹ ٹیم پہلے ہی بھرپور تیاری کر چکی ہے۔ یہ میچ شائقینِ کرکٹ کے لیے خصوصی اہمیت کا حامل سمجھا جا رہا ہے۔