پاکستان اور آسٹریلیا کے درمیان ون ڈے سیریز کا پہلا میچ آج میلبورن میں ہوگا

میلبورن، یورپ ٹوڈے: پاکستان اور آسٹریلیا کی کرکٹ ٹیموں کے درمیان تین ون ڈے انٹرنیشنل میچوں پر مشتمل سیریز کا پہلا میچ آج میلبورن کرکٹ گراؤنڈ (ایم سی جی) میں کھیلا جائے گا۔ میزبان آسٹریلیا کی قیادت پیٹ کمنز کریں گے جبکہ پاکستان کی جانب سے محمد رضوان کپتانی کے فرائض انجام دیں گے۔

میچ کا آغاز پاکستانی وقت کے مطابق صبح 8 بجکر 30 منٹ پر ہوگا۔ پاکستانی ٹیم تقریباً ایک سال بعد ون ڈے انٹرنیشنل کھیل رہی ہے، اور اس میچ میں گرین شرٹس نے بھرپور تیاری کے ساتھ میدان میں اترنے کا فیصلہ کیا ہے۔ پاکستانی ٹیم نے چار فاسٹ بولرز، شاہین شاہ آفریدی، نسیم شاہ، حارث رؤف، اور محمد حسنین کو ٹیم میں شامل کیا ہے تاکہ مخالف ٹیم پر زبردست دباؤ ڈالا جا سکے۔

ٹیم کے نائب کپتان سلمان علی آغا اور صائم ایوب پارٹ ٹائم اسپننگ کا کردار ادا کریں گے، جبکہ عرفان نیازی اپنا ون ڈے ڈیبیو کریں گے۔

پاکستانی ٹیم میں شامل کھلاڑی:
محمد رضوان (کپتان)، سلمان علی آغا (نائب کپتان)، عبداللہ شفیق، صائم ایوب، بابر اعظم، کامران غلام، محمد عرفان خان، شاہین شاہ آفریدی، نسیم شاہ، حارث رؤف اور محمد حسنین۔

آسٹریلیا کی ٹیم میں شامل کھلاڑی:
پیٹ کمنز (کپتان)، جیک فریزر میکگورک، میتھیو شارٹ، اسٹیو اسمتھ، جوش انگلیس، مارنس لیبوشین، آرون ہارڈی، گلین میکسویل، شان ایبٹ، مچل اسٹارک اور ایڈم زمپا۔

سیریز کے بقیہ میچز 8 نومبر کو ایڈیلیڈ اوول اور 10 نومبر کو پرتھ اسٹیڈیم میں کھیلے جائیں گے۔ یہ تینوں میچز ڈے اینڈ نائٹ فارمیٹ میں ہوں گے۔

اس دورے میں تین میچوں کی ٹی ٹوئنٹی سیریز بھی شامل ہے، جس کا پہلا میچ 14 نومبر، دوسرا 16 نومبر کو سڈنی کرکٹ گراؤنڈ میں جبکہ تیسرا اور آخری ٹی ٹوئنٹی میچ 18 نومبر کو ہوبارٹ میں کھیلا جائے گا۔