پاک بحریہ میں ورلڈ میری ٹائم ڈے کے حوالے سے سرگرمیوں کا انعقاد

کراچی، یورپ ٹوڈے: پاک بحریہ نے ورلڈ میری ٹائم ڈے کی مناسبت سے مختلف تقریبات کا انعقاد کیا، جس کا موضوع اس سال ’مستقبل کی جہاز رانی، حفاظت سب سے پہلے‘ تھا۔ اس موقع پر پاک فوج کے شعبہ تعلقات عامہ (آئی ایس پی آر) کے مطابق، سربراہ پاک بحریہ نے ماحول دوست قوانین کو قومی مفادات سے ہم آہنگ کرنے کی ضرورت پر زور دیا۔

میری ٹائم سیکٹر کی اہمیت کو اجاگر کرنے کیلئے پاک بحریہ کی جانب سے سیمینارز منعقد کیے گئے، جن کا اہتمام میری ٹائم سینٹر آف ایکسیلینس اور نیشنل انسٹیٹیوٹ آف میری ٹائم افئیرز کے پلیٹ فارمز سے کیا گیا۔ ان تقریبات میں میری ٹائم گالا، واک، مضمون نویسی کے مقابلے اور لیکچرز بھی شامل تھے۔

سربراہ پاک بحریہ نے عوام میں میری ٹائم سیکٹر سے متعلق آگاہی پیدا کرنے کے لیے تمام وسائل بروئے کار لانے کا عزم ظاہر کیا۔ آئی ایس پی آر کا کہنا ہے کہ یہ دن نہ صرف شپنگ سیفٹی بلکہ سمندری وسائل اور ان کے تحفظ کی اہمیت کو اجاگر کرنے کے لیے منایا جاتا ہے۔