اقوام متحدہ میں پاکستان نے بھارتی الزامات مسترد کر دیے، کشمیر سے کلبھوشن تک ٹھوس شواہد پیش

نیویارک، یورپ ٹوڈے: اقوام متحدہ کی جنرل اسمبلی کے 80 ویں اجلاس میں پاکستان کے سیکنڈ سیکرٹری محمد راشد نے بھارت کے الزامات کو یکسر مسترد کرتے ہوئے اسے خطے میں دہشتگردی، انسانی حقوق کی پامالی اور ریاستی جبر کا اصل ذمہ دار قرار دیا۔

محمد راشد نے اپنے خطاب میں کہا کہ بھارتی وزیر خارجہ کے بیان میں پرانی اور بے بنیاد تقاریر دہرائی گئیں جو پاکستان کو بدنام کرنے کی ناکام کوشش ہیں۔ انہوں نے واضح کیا کہ پاکستان نے دہشت گردی کے خلاف جنگ میں 90 ہزار سے زائد جانوں کی قربانیاں دی ہیں، جو عالمی سطح پر تسلیم شدہ ہیں، اور پاکستان عالمی انسداد دہشت گردی کی کوششوں میں ایک مضبوط شراکت دار ہے۔

پاکستانی مندوب نے تین نکات پر زور دیا: اول، بھارت غیرقانونی قبضوں اور انسانی حقوق کی پامالیوں میں ملوث ہے، خصوصاً مقبوضہ جموں و کشمیر میں ریاستی دہشتگردی روزمرہ کا معمول ہے۔ دوم، بھارت خفیہ اور سرحد پار دہشت گردانہ نیٹ ورک چلاتا ہے، جس کی زندہ مثال کلبھوشن یادو کی گرفتاری ہے۔ سوم، بھارت بغیر ثبوت ہر واقعہ پاکستان پر ڈال دیتا ہے، جیسا کہ پہلگام واقعے میں ہوا، جس پر پاکستان نے آزاد تحقیقات کی پیشکش کی مگر بھارت نے اسے رد کر دیا۔

محمد راشد نے مزید بتایا کہ بھارت نے اس واقعے کو جواز بنا کر پاکستان پر کھلی جارحیت کی جس میں 54 بے گناہ شہری شہید ہوئے، جن میں خواتین اور بچے بھی شامل تھے۔ پاکستان نے اقوام متحدہ کے چارٹر کے آرٹیکل 51 کے تحت اپنے دفاع کا حق استعمال کرتے ہوئے بھرپور مگر محتاط جواب دیا اور بھارتی فوجی اہداف کو نشانہ بنایا۔

انہوں نے عالمی برادری کو خبردار کیا کہ بھارت کا رویہ بین الاقوامی قوانین کے لیے خطرناک نظیر قائم کرتا ہے، جسے کسی صورت نظر انداز نہیں کیا جانا چاہیے۔

آخر میں پاکستانی مندوب نے زور دیا کہ پاکستان خطے میں امن کا خواہاں ہے۔ جنوبی ایشیا کے عوام خوشحالی اور استحکام کے مستحق ہیں، جو صرف باہمی احترام، خلوص، مکالمے اور سفارت کاری سے حاصل کیے جا سکتے ہیں۔ بھارت کو بھی اگر امن چاہیے تو یہی راستہ اپنانا ہوگا۔