پاکستان اور ایران کا غزہ کی صورتحال پر اظہار تشویش، او آئی سی اجلاس کی حمایت

اسلام آباد، یورپ ٹوڈے: نائب وزیر اعظم اسحاق ڈار اور ایران کے وزیر خارجہ سید عباس عراقچی کے درمیان ٹیلی فونک رابطہ ہوا، جس میں غزہ میں فلسطینی عوام کی بگڑتی ہوئی صورتحال پر تبادلہ خیال کیا گیا۔

ترجمان دفتر خارجہ شفقت علی خان کے مطابق، دونوں وزراء نے مشرق وسطیٰ کی صورتحال پر خصوصی توجہ مرکوز کی اور فلسطینی عوام کو زبردستی بے گھر کرنے کی کسی بھی تجویز کو انتہائی پریشان کن اور غیر منصفانہ قرار دیا۔

نائب وزیر اعظم نے اس بات پر زور دیا کہ فلسطینی سرزمین، فلسطینی عوام کا حق ہے اور اقوام متحدہ کی سلامتی کونسل کی قراردادوں کے مطابق دو ریاستی حل ہی واحد قابلِ عمل اور منصفانہ آپشن ہے۔

انہوں نے مزید کہا کہ پاکستان 1967 کی سرحدوں کے مطابق ایک خودمختار، متحد اور آزاد فلسطینی ریاست کے قیام کی مکمل حمایت کرتا ہے، جس کا دارالحکومت القدس الشریف ہو۔

دفتر خارجہ کے ترجمان کے مطابق، نائب وزیر اعظم نے او آئی سی وزرائے خارجہ کے غیر معمولی اجلاس کے انعقاد کے لیے پاکستان کی حمایت کا اعادہ کیا، تاکہ فلسطینی عوام کی حالت زار پر تفصیلی غور و خوض کیا جا سکے۔ فریقین نے اس حوالے سے آئندہ دنوں میں قریبی رابطہ برقرار رکھنے پر اتفاق کیا۔