وزیراعظم شہباز شریف کی ویتنامی ہم منصب سے ملاقات، تجارتی و سرمایہ کاری تعلقات کے فروغ پر اتفاق
ریاض، یورپ ٹوڈے: وزیراعظم محمد شہباز شریف نے ریاض میں 8ویں فیوچر انویسٹمنٹ انیشیٹو کانفرنس کے موقع پر ویتنام کے وزیراعظم فام من چن سے ملاقات کی۔ بدھ کو وزیراعظم آفس کے جاری کردہ بیان کے مطابق دونوں رہنماؤں نے پاکستان اور ویتنام کے دوطرفہ تعلقات کو مستحکم کرنے، بالخصوص تجارت اور سرمایہ کاری میں تعاون کو فروغ دینے کے حوالے سے تفصیلی تبادلہ خیال کیا۔
وزیراعظم شہباز شریف نے تجارتی و کاروباری وفود کے تبادلوں کی تجویز دیتے ہوئے دونوں ممالک کے درمیان تعاون کی صلاحیت کو سراہا۔ ملاقات کے دوران دونوں رہنماؤں نے عوامی روابط مضبوط کرنے اور سیاحت کے فروغ کے لئے باہمی عزم کا اظہار کیا۔
وزیراعظم نے ویتنام سے آسیان تنظیم میں پاکستان کے مکمل ڈائیلاگ پارٹنر بننے کی کوششوں میں تعاون کی درخواست بھی کی۔ انہوں نے ویتنام کے وزیراعظم کو پاکستان کا سرکاری دورہ کرنے کی دعوت دی۔ اس موقع پر وزیر دفاع خواجہ محمد آصف، وزیر خزانہ محمد اورنگزیب، وزیر نجکاری عبدالعلیم خان، وزیر پٹرولیم ڈاکٹر مصدق ملک، وزیر تجارت جام کمال خان اور وزیر اطلاعات و نشریات عطاء اللہ تارڑ بھی موجود تھے۔
