پاکستان اور ترکیہ کا غزہ کیلئے انسانی امداد کی فراہمی، فوری جنگ بندی اور دیرپا امن پر زور
اسلام آباد: پاکستان اور ترکیہ نے پیر کے روز غزہ میں انسانی بنیادوں پر امداد کی بلا تعطل فراہمی، فوری جنگ بندی اور ایک منصفانہ، دیرپا اور جامع امن کے لیے عالمی برادری کی مشترکہ کوششوں کی فوری ضرورت پر زور دیا۔
یہ بات نائب وزیر اعظم اور وزیر خارجہ سینیٹر محمد اسحاق ڈار اور ترک وزیر خارجہ حکان فدان کے درمیان ٹیلیفونک گفتگو کے دوران کہی گئی۔
دونوں رہنماؤں نے غزہ میں اسرائیلی جارحیت کی شدید مذمت کرتے ہوئے بگڑتی ہوئی انسانی صورتحال پر گہری تشویش کا اظہار کیا، جس میں بھوک، جبری نقل مکانی اور معصوم جانوں کا ضیاع شامل ہے۔
انہوں نے فلسطینی عوام اور ان کے جائز کاز کے لیے غیر متزلزل حمایت کا اعادہ کیا اور اقوام متحدہ میں پیر کے روز منعقد ہونے والی دو ریاستی حل کے نفاذ سے متعلق بین الاقوامی کانفرنس سے مثبت نتائج کی امید ظاہر کی۔
