بنگلادیش کی تاریخی کامیابی: پاکستان کو ٹیسٹ سیریز میں وائٹ واش کردیا

راولپنڈی، یورپ ٹوڈے: بنگلادیش نے ٹیسٹ سیریز میں پاکستان کو تاریخی شکست دے کر وائٹ واش کر دیا۔ راولپنڈی کے پنڈی کرکٹ اسٹیڈیم میں کھیلے گئے دوسرے ٹیسٹ میچ میں بنگلادیش نے پاکستان کو 4 وکٹوں سے شکست دے دی اور سیریز میں دو۔صفر سے کامیابی حاصل کر لی۔

پاکستان کرکٹ ٹیم کو تاریخ میں دوسری مرتبہ اپنی سرزمین پر وائٹ واش کا سامنا کرنا پڑا ہے۔ حال ہی میں انگلینڈ نے بھی پاکستان کو تین۔صفر سے شکست دے کر پاکستان کے ہوم گراؤنڈ پر پہلی مرتبہ وائٹ واش کیا تھا۔

بنگلادیش نے پاکستان کی جانب سے دیا گیا 185 رنز کا ہدف 4 وکٹوں کے نقصان پر حاصل کر لیا۔ بنگلادیش کے اوپنرز ذاکر حسن اور شادمان اسلام نے بالترتیب 40 اور 24 رنز بنائے جبکہ نجم الحسین شانتو اور مومن الحق نے 38 اور 34 رنز کی اننگز کھیلی۔

پاکستان کی جانب سے میر حمزہ، خرم شہزاد، ابرار احمد اور سلمان علی آغا نے ایک ایک وکٹ حاصل کی۔

پاکستان کی دوسری اننگز کی ناکامی

پاکستان کی دوسری اننگز میں بیٹنگ لائن مکمل طور پر ناکام ہو گئی اور ٹیم 172 رنز پر ڈھیر ہو گئی، جس سے بنگلادیش کو جیت کے لیے محض 185 رنز کا ہدف ملا۔

پاکستان کے ابتدائی بلے باز جلد پویلین لوٹ گئے، جبکہ محمد رضوان اور سلمان علی آغا نے کچھ مزاحمت دکھائی۔ رضوان نے 43 رنز بنائے جبکہ سلمان علی آغا 47 رنز کے ساتھ ناٹ آؤٹ رہے، تاہم دوسرے سرے سے وکٹیں گرنے کا سلسلہ جاری رہا۔

بنگلادیش کی جانب سے حسن محمود نے 5 وکٹیں، ناہید رانا نے 4 وکٹیں اور تسکین احمد نے ایک وکٹ حاصل کی۔

پاکستان کی پہلی اننگز اور بنگلادیش کی جوابی کارکردگی

پاکستان کی پہلی اننگز میں ٹیم 274 رنز بنا کر آؤٹ ہوئی۔ صائم ایوب، شان مسعود اور سلمان علی آغا نے بالترتیب 58، 57 اور 54 رنز بنائے۔ بنگلادیش کی جانب سے مہدی حسن میراج نے 5 وکٹیں حاصل کیں۔

بنگلادیش کی پہلی اننگز میں ٹیم 261 رنز پر آؤٹ ہو گئی تھی۔ لٹن داس کی شاندار سنچری اور مہدی حسن کے 78 رنز نے بنگلادیش کو ابتدائی مشکلات سے نکالا۔

پاکستان کی جانب سے خرم شہزاد نے 6 وکٹیں حاصل کیں، جبکہ میر حمزہ اور سلمان علی آغا نے 2، 2 وکٹیں لیں۔