یومِ دفاع کی اہمیت اور افواج پاکستان کا عزم: جنرل عاصم منیر کا پیغام

راولپنڈی، یورپ ٹوڈے: پاک فوج کے سربراہ جنرل عاصم منیر نے 6 ستمبر کو یومِ دفاعِ وطن کے طور پر نمایاں حیثیت کا حامل قرار دیتے ہوئے کہا ہے کہ آج کے دن افواجِ پاکستان نے دشمن کے ناپاک عزائم کو خاک میں ملایا تھا۔

پاک فوج کے شعبۂ تعلقاتِ عامہ (آئی ایس پی آر) کے مطابق، یومِ دفاع پاکستان کے موقع پر اپنے خصوصی پیغام میں جنرل عاصم منیر نے کہا کہ جنگِ ستمبر کے دوران قومی یکجہتی اور اتحاد کا جذبہ ہمارے لیے فخر کا سرمایہ ہے۔

جنرل عاصم منیر کا کہنا تھا کہ آج بھی ہماری افواج اسی جذبے کے ساتھ سرحدوں کی حفاظت کر رہی ہیں، جس طرح ستمبر 1965 میں انہوں نے جرأت اور بہادری کا مظاہرہ کیا تھا، یہ مثال آئندہ نسلوں کے لیے مشعلِ راہ ہے۔

آرمی چیف نے شہداء کی اہمیت کو اجاگر کرتے ہوئے کہا کہ شہداء اور ان کے اہلِ خانہ کی حرمت اور حفاظت کا فریضہ بخوبی انجام دینا ہماری ذمہ داری ہے۔ ان کا مزید کہنا تھا کہ ایمان، تقویٰ اور جہاد فی سبیل اللّٰہ دشمن سے نمٹنے کا ہمارا مضبوط ترین ہتھیار ہیں۔ دہشت گردی کے خلاف افواجِ پاکستان کی بہادری اور جوانمردی کی بدولت آج ملک کو اس عفریت سے نجات مل چکی ہے۔

جنرل عاصم منیر نے ڈیجیٹل دہشت گردی اور ففتھ جنریشن جنگ کو نئے چیلنجز قرار دیتے ہوئے کہا کہ یہ روایتی دہشت گردی سے کہیں زیادہ خطرناک اور پیچیدہ ہیں۔ ملک دشمن عناصر اور غیر ملکی اداروں کی شراکت سے یہ خطرات بڑھتے جا رہے ہیں، مگر افواجِ پاکستان اور قانون نافذ کرنے والے اداروں کی کوششوں سے ملک محفوظ ہے۔

آرمی چیف نے وطن کی سلامتی اور خوش حالی کے عزم کا اعادہ کرتے ہوئے کہا کہ ہمیں اپنے اختلافات کو پس پشت ڈال کر مثالی اتحاد اور یکجہتی کا مظاہرہ کرنا ہوگا، کیونکہ جب تک ہم متحد رہیں گے، دنیا کی کوئی طاقت پاکستان کو نقصان نہیں پہنچا سکتی۔