پاکستان نے 5 ماہ میں 2 ارب 66 کروڑ ڈالرز کی غیر ملکی فنڈنگ حاصل کی

اسلام آباد، یورپ ٹوڈے: وزارت اقتصادی امور کی رپورٹ کے مطابق پاکستان نے رواں مالی سال 2024ء کے ابتدائی پانچ ماہ (جولائی تا نومبر) میں 2 ارب 66 کروڑ 79 لاکھ ڈالرز کی غیر ملکی فنڈنگ حاصل کی ہے۔

رپورٹ کے مطابق آئی ایم ایف کے 1 ارب 2 کروڑ ڈالرز کی شمولیت سے مجموعی فنانسنگ کا حجم 3 ارب 68 کروڑ ڈالرز سے تجاوز کر جائے گا۔

ماہ نومبر کے دوران 94 کروڑ 42 لاکھ ڈالرز کی غیر ملکی فنانسنگ موصول ہوئی، جبکہ جولائی تا نومبر مجموعی طور پر 2 ارب 57 کروڑ ڈالرز کا غیر ملکی قرضہ لیا گیا۔

رپورٹ میں یہ بھی بتایا گیا ہے کہ مالی سال کے ابتدائی 5 ماہ میں 9 کروڑ 44 لاکھ ڈالرز کی گرانٹس موصول ہوئیں۔ تاہم نومبر 2024ء تک سعودی عرب کا 5 ارب ڈالرز کا ڈیپازٹ اور چین سے 4 ارب ڈالرز کا سیف ڈیپازٹ وصول نہیں ہوا۔

یاد رہے کہ وفاقی حکومت نے مالی سال 2024ء کے دوران 19 ارب 39 کروڑ ڈالرز کی بیرونی فنانسنگ حاصل کرنے کا تخمینہ لگایا ہوا ہے۔