سانحہ آرمی پبلک اسکول کی دسویں برسی: وزیراعظم کا شہداء کو خراج عقیدت

اسلام آباد، یورپ ٹوڈے: وزیر اعظم محمد شہباز شریف نے سانحہ آرمی پبلک اسکول کے دس برس مکمل ہونے پر اپنے پیغام میں شہداء کو خراج عقیدت پیش کرتے ہوئے کہا کہ “ہم کبھی نہیں بھولیں گے، کبھی معاف نہیں کریں گے۔”

وزیر اعظم نے کہا کہ یہ سانحہ پاکستان کی تاریخ کے ناقابل فراموش حادثات میں سے ایک ہے، جس میں 16 دسمبر 2014 کو بزدل دہشت گردوں نے آرمی پبلک اسکول پشاور پر حملہ کر کے 144 معصوم جانوں کو شہید کر دیا۔ ان شہداء میں اکثریت کم سن بچوں کی تھی جن کے خواب، امیدیں، اور مستقبل ظالموں نے چھین لیا۔

قوم دہشت گردوں کے خلاف متحد ہے

وزیر اعظم نے کہا کہ قوم کو یاد رکھنا چاہیے کہ “فتنہ الخوارج اور ان جیسے دوسرے دہشت گرد ملک دشمن گروہوں کا نہ دین سے کوئی تعلق ہے اور نہ ہی کسی معاشرتی اقدار سے۔” یہ بیرونی دشمنوں کے ایما پر معصوم پاکستانیوں کو نشانہ بناتے ہیں، لیکن پوری قوم ان کے خلاف سیسہ پلائی دیوار بن کر کھڑی ہے اور ہمیشہ کھڑی رہے گی۔

شہداء اور ان کے خاندانوں کو خراج تحسین

انہوں نے کہا کہ پوری قوم ان معصوم بچوں اور بہادر اساتذہ کی قربانیوں کو سلام پیش کرتی ہے، جنہوں نے اس سانحے میں اپنی جانیں قربان کیں۔ وزیر اعظم نے ان خاندانوں کے غم کو ناقابل بیان قرار دیتے ہوئے کہا کہ یہ صدمہ وقت گزرنے کے باوجود کبھی ختم نہیں ہو سکتا۔

وزیر اعظم نے مزید کہا کہ “آئیے آج ہم ایک پر امن اور محفوظ پاکستان کی تعمیر کے لیے اپنے عزم کا اعادہ کریں، جہاں کسی معصوم کو دوبارہ ظلم و بربریت کا سامنا نہ کرنا پڑے، اور کسی بھی ناانصافی کی سخت ترین سزا دی جائے۔”

شہداء کا قرض: عزم نو

وزیر اعظم نے اپنے پیغام کا اختتام ان الفاظ پر کیا کہ “یہ ہم سب پر سانحے کے متاثرین اور شہداء کا قرض ہے کہ ہم اس بات کو یقینی بنائیں کہ ان کی قربانیاں رائیگاں نہ جائیں۔ ہم کبھی نہیں بھولیں گے، اور کبھی معاف نہیں کریں گے۔”