ایس آئی ایف سی کی سہولت کاری سے توانائی کے ذخائر میں نمایاں اضافہ، ماڑی پیٹرولیم کی مدتِ دستیابی 17 سال تک بڑھ گئی
اسلام آباد، یورپ ٹوڈے: حکومت کے ایس آئی ایف سی (اسپیشل انویسٹمنٹ فسیلیٹیشن کونسل) کی سہولت کاری اور پالیسی سطح پر کیے گئے اقدامات کے نتیجے میں پاکستان کے توانائی کے شعبے میں نمایاں پیشرفت سامنے آئی ہے۔ ان اقدامات کی بدولت ماڑی پیٹرولیم کے ذخائر کی دستیابی کی مدت 17 سال تک بڑھا دی گئی ہے۔
ایس آئی ایف سی نے توانائی کے شعبے کی ترقی کو اپنی اولین ترجیح قرار دیا ہے، جو ملکی معاشی استحکام کے لیے ایک اہم سنگِ میل ہے۔ ماڑی پیٹرولیم نے گزشتہ پانچ سالوں میں اوسطاً 100 فیصد سے زائد ذخائر متبادل کا تناسب حاصل کیا، جو اس شعبے کی کامیابیوں کی ایک روشن مثال ہے۔
کمپنی کی بہتر پالیسیوں اور پائیدار اقدامات نے اسے گردشی قرضوں کے اثرات سے محفوظ رکھا، جبکہ حکومتی پالیسی اقدامات کی بدولت ماڑی پیٹرولیم نے گزشتہ سال مارکیٹ میں 17 فیصد کارکردگی میں بہتری دکھائی۔
ترقیاتی منصوبوں اور نئے ذخائر کی دریافت کے باعث ماڑی پیٹرولیم کی آمدنی میں مزید اضافے کی توقع کی جا رہی ہے، جو توانائی کے شعبے میں سرمایہ کاری اور معاشی ترقی کے لیے ایک مثبت اشارہ ہے۔
یہ اقدامات توانائی کے شعبے میں خود کفالت کی جانب ایک اہم قدم ہیں، جو پاکستان کی معاشی استحکام اور پائیدار ترقی کے لیے انتہائی اہمیت کے حامل ہیں۔
