وفاقی وزیر خزانہ کا نان فائلرز کے معاملے پر مؤقف

اسلام آباد، یورپ ٹوڈے: وفاقی وزیر خزانہ محمد اورنگزیب نے واضح کیا ہے کہ حکومت ٹیکس کے سلسلے میں کسی کو ہراساں نہیں کرے گی۔ انہوں نے کہا کہ نان فائلر گاڑیاں اور جائیدادیں نہیں خرید سکیں گے، اس حوالے سے ہمیں قانونی کور کی ضرورت ہے۔

واشنگٹن میں ایک پریس کانفرنس کے دوران وزیر خزانہ نے بتایا کہ حکومت نان فائلر کی اصطلاح کو ختم کر رہی ہے۔ ان کا کہنا تھا کہ امریکہ میں اسٹیک ہولڈرز سے ملاقاتیں مثبت رہی ہیں، جنہوں نے پاکستان میں مہنگائی میں کمی کو سراہا ہے۔

انہوں نے مزید کہا کہ تمام ریٹنگ ایجنسیاں یہ کہہ رہی ہیں کہ پاکستان درست معاشی سمت پر گامزن ہے۔ انہوں نے اس بات پر بھی زور دیا کہ ورلڈ بینک پاکستان کو قرض نہیں گرانٹ دے گا، جبکہ آئی ایم ایف کے ساتھ تعمیری بات چیت جاری ہے۔

وزیر خزانہ محمد اورنگزیب نے کہا کہ یہ کوشش کی جائے گی کہ ہمارا آئی ایم ایف کے ساتھ یہ آخری پروگرام ہو، اور ہمارے اقدامات کی بدولت ملک میکرو اکنامک استحکام کی جانب بڑھ رہا ہے۔ انہوں نے یہ بھی کہا کہ معیشت کی بہتری کے لیے ہمیں مشکل فیصلے کرنے ہوں گے اور پاکستان پائیدار ترقی کے راستے پر گامزن ہے۔