پاکستان اور بنگلہ دیش کے تعلقات میں بہتری، دشمنی کے بجائے دوستی کو فروغ دینے کی خواہش

ڈھاکہ یورپ ٹوڈے: بنگلادیشی میڈیا کے مطابق، خارجہ امور کے مشیر توحید حسین نے کہا ہے کہ بنگلہ دیش پاکستان کے ساتھ دشمنی نہیں بلکہ دوستی کا خواہاں ہے، اور دونوں ممالک کے درمیان تعلقات کو معمول پر لانا چاہتے ہیں۔ انہوں نے کہا کہ موجودہ حالات میں پاکستان کے ساتھ دشمنی سے کوئی فائدہ نہیں ہے، اور بنگلہ دیش کی خارجہ پالیسی میں نمایاں تبدیلیاں آرہی ہیں۔

مشیر توحید حسین نے مزید کہا کہ بنگلہ دیش بھارت کے ساتھ تعلقات میں بھی سرد مہری محسوس کر رہا ہے، جو عوامی لیگ کی 15 سالہ حکمرانی کے پُرتشدد خاتمے کے بعد سے واضح ہوئی ہے۔ تاہم، پاکستان کے ساتھ تعلقات کا ازسرنو جائزہ لینے کی ضرورت ہے، اور دونوں ممالک کے درمیان خوشگوار اور متوازن تعلقات ہونے چاہئیں۔

انہوں نے مزید کہا کہ پاکستان اور بنگلہ دیش کے درمیان بہتر تعلقات سے دونوں ممالک کے عوام کو فائدہ ہوگا۔ سابقہ حکومت کی جانب سے بھارت کے ساتھ تعلقات کو ایک “سنہری باب” کہا جاتا رہا ہے، لیکن مشیر کا کہنا تھا کہ تعلقات کو حکومتوں کے بجائے عوام پر مرکوز ہونا چاہئے۔

دوسری جانب، پاکستان نے نئی ویزا پالیسی کا اعلان کیا ہے، جس کے تحت بنگلہ دیش سمیت 126 ممالک کے شہری بغیر ویزا فیس کے پاکستان کا سفر کر سکیں گے۔ بنگلہ دیش میں پاکستان کے ہائی کمشنر احمد معروف نے اس بات کا اعلان کیا اور دونوں ممالک کے درمیان براہ راست پروازوں کی بحالی اور دوطرفہ تجارت کو فروغ دینے کی ضرورت پر زور دیا۔

یاد رہے کہ آخری براہ راست پرواز 2018 میں پاکستان انٹرنیشنل ایئرلائنز (پی آئی اے) نے چلائی تھی۔