پاکستان اور روس کے درمیان تعلقات میں بہتری، توانائی کے شعبے میں تعاون پر زور

اسلام آباد، یورپ ٹوڈے: نائب وزیراعظم اور وزیر خارجہ اسحاق ڈار نے کہا ہے کہ پاکستان اور روس کے تعلقات درست سمت میں گامزن ہیں اور توانائی کے شعبے میں تعاون کو مزید فروغ دیا جائے گا۔

اسلام آباد میں پاکستان اور روس کے نائب وزرائے اعظم نے مشترکہ پریس کانفرنس کے دوران اسحاق ڈار نے کہا کہ شنگھائی تعاون تنظیم (ایس سی او) کے لیے پاکستان روس کا مشکور ہے۔ انہوں نے مزید کہا کہ افغانستان کے معاملے پر بھی دونوں ممالک کے درمیان تعاون جاری ہے۔

اسحاق ڈار نے کہا، “پاکستان اور روس کے تعلقات درست سمت میں جا رہے ہیں۔ آج کی ملاقات میں روس کے نائب وزیراعظم کے ساتھ تفصیلی گفتگو ہوئی ہے، جس میں باہمی دلچسپی کے امور، تجارت، معیشت، اور توانائی کے شعبوں میں تعاون پر بات چیت کی گئی ہے۔”

روسی نائب وزیراعظم الیکسی ورچوک نے کہا کہ تجارت، معیشت، اور ثقافتی تعلقات کو مضبوط کرنے کے لیے تفصیلی بات چیت ہوئی ہے، اور روس پاکستان کی معیشت میں مدد فراہم کرنے کے طریقے پر غور کر رہا ہے۔ انہوں نے کہا کہ ملاقات میں کاروباری اور عوامی روابط پر بھی بات چیت کی گئی ہے اور روسی وزیراعظم کی ایس سی او میں شرکت کی توقع ہے۔

الیکسی ورچوک نے مزید کہا، “روس اس سال برکس کی میزبانی کر رہا ہے اور ہمیں خوشی ہے کہ پاکستان برکس کی رکنیت کے لیے درخواست دی ہے۔ ہمارے پاکستان سے اچھے تعلقات ہیں اور اتفاق رائے سے پاکستان کو برکس کا رکن بنایا جا سکتا ہے۔”

نائب وزیراعظم اسحاق ڈار نے کہا کہ برکس کی رکنیت کے لیے ایک مخصوص طریقہ کار موجود ہے، جس کے تحت پاکستان درخواست دے رہا ہے۔ انہوں نے کہا کہ تمام رکن ممالک کی اتفاق رائے کے بغیر کوئی بھی فیصلہ نہیں ہو سکتا۔