یورپ اور برطانیہ کے لیے پروازوں کی بحالی کا منصوبہ: پی آئی اے نیٹ ورک کی توسیع کی تیاری میں
کراچی، یورپ ٹوڈے: یورپی ایوی ایشن سیفٹی ایجنسی (EASA) کی جانب سے عائد پابندی کے خاتمے کے بعد پاکستان انٹرنیشنل ایئر لائنز (پی آئی اے) نے اپنے نیٹ ورک کو یورپ اور برطانیہ تک بڑھانے کا منصوبہ تیار کر لیا ہے۔
ترجمان پی آئی اے کے مطابق، قومی ایئر لائن اپنے طیاروں کی بحالی کے عمل میں مصروف ہے۔ طویل مدتی اسٹوریج میں موجود طیارے دوبارہ آپریشنل سروس میں لائے جا رہے ہیں۔
منصوبے کے تحت، بوئنگ 777 کے آپریشنل بیڑے کی تعداد بڑھا کر آٹھ کر دی جائے گی، جبکہ اے 320 طیاروں کی تعداد 12 تک پہنچنے کی توقع ہے۔ اسی طرح اے ٹی آر طیاروں کی تعداد بھی دو تک ہو جائے گی۔ یہ فلیٹ اپ گریڈ 2025 کے لیے پی آئی اے کے جارحانہ آپریٹنگ پلان کے مطابق ہے۔
ترجمان کے مطابق، نیٹ ورک کی توسیع کے ساتھ ساتھ، نئے فضائی روٹس کے ذریعے بیرون ملک مقیم تارکین وطن کو براہ راست اور کم خرچ سفری سہولت فراہم کی جائے گی۔
پی آئی اے کی کارکردگی کے حوالے سے ترجمان نے بتایا کہ ان کوششوں کے نتیجے میں پروازوں کی بروقت روانگی کی شرح 90 فیصد سے تجاوز کر چکی ہے، جو کہ ملک میں سب سے زیادہ ہے۔
ایئر لائن انتظامیہ کا عزم ہے کہ اپنے نیٹ ورک کو مزید بڑھاتے ہوئے دنیا بھر میں سفر کے لیے معیاری اور باسہولت خدمات فراہم کی جائیں۔
