وزیراعظم شہباز شریف سے برطانوی ہائی کمشنر کی ملاقات، دوطرفہ تعلقات اور عالمی امور پر تبادلہ خیال

اسلام آباد، یورپ ٹوڈے: وزیراعظم شہباز شریف سے پاکستان میں تعینات برطانوی ہائی کمشنر جین میریٹ نے ملاقات کی، جس میں دوطرفہ تعلقات اور عالمی امور پر تبادلہ خیال کیا گیا۔

وزیراعظم نے اس موقع پر برطانیہ کے بادشاہ، شاہ چارلس سوم کے لیے نیک تمناؤں کا اظہار کیا اور انہیں پاکستان کے دورے کی دعوت کا اعادہ کیا۔ انہوں نے پاکستان اور برطانیہ کے درمیان دوطرفہ تعلقات میں ہونے والی پیشرفت پر اطمینان کا اظہار کرتے ہوئے کہا کہ دونوں ممالک کے درمیان تعاون مزید فروغ پائے گا۔

وزیراعظم نے غزہ اور یوکرین میں دیرپا امن کے قیام کے لیے اجتماعی کوششوں کی ضرورت پر بھی زور دیا اور عالمی برادری سے امن کے قیام کے لیے مؤثر کردار ادا کرنے کی اپیل کی۔

اس موقع پر برطانوی ہائی کمشنر جین میریٹ نے کہا کہ برطانیہ پاکستان کے ساتھ تعلقات کو مزید مضبوط بنانے اور باہمی شراکت داری کو جاری رکھنے کے لیے پُرعزم ہے۔