وزیراعظم شہباز شریف کی آذربائیجان کے سفارتخانے آمد، طیارہ حادثے پر اظہارِ تعزیت

اسلام آباد، یورپ ٹوڈے: وزیرِاعظم محمد شہباز شریف نے جمعرات کو آذربائیجان کے سفارتخانے کا دورہ کیا اور قازقستان کے علاقے آکتاؤ میں طیارہ حادثے میں قیمتی جانوں کے نقصان پر آذربائیجان کے سفیر خضر فرہادوف سے تعزیت کی۔

وزیرِاعظم نے حادثے میں جاں بحق ہونے والوں کے لیے دعائے مغفرت اور متاثرہ خاندانوں کے لیے صبر کی دعا کی۔ انہوں نے زخمیوں کی جلد صحتیابی کے لیے بھی دعا کی۔

وزیرِاعظم نے اس موقع پر کہا کہ پاکستان کے عوام اور حکومت اس دکھ کی گھڑی میں آذربائیجان کے بھائیوں اور بہنوں کے ساتھ مکمل یکجہتی کا اظہار کرتے ہیں۔ انہوں نے آذربائیجان اور پاکستان کے مابین مذہبی اور ثقافتی اقدار پر مبنی مضبوط برادرانہ تعلقات کو اجاگر کیا۔

آذربائیجان کے سفیر خضر فرہادوف نے وزیرِاعظم کے دورے پر شکریہ ادا کیا اور کہا کہ ان کے ملک میں پاکستان کے وزیرِاعظم کے اس وقتِ غم میں سفارتخانے کے دورے کو بہت قدر کی نگاہ سے دیکھا جاتا ہے۔

وفاقی وزیرِ اطلاعات و نشریات عطااللہ تارڑ اور وزیرِاعظم کے معاونِ خصوصی طارق فاطمی بھی وزیرِاعظم کے ہمراہ تھے۔