وزیر اعظم شہباز شریف کا پرائیویٹ حج کوٹہ میں کمی کا سخت نوٹس، تین رکنی انکوائری کمیٹی قائم

اسلام آباد، یورپ ٹوڈے: وزیر اعظم شہباز شریف نے رواں سال پرائیویٹ حج کوٹے میں کمی اور ہزاروں پاکستانیوں کے حج سے محروم رہ جانے پر سخت نوٹس لیتے ہوئے فوری انکوائری کا حکم دے دیا ہے۔ اس سلسلے میں تین رکنی اعلیٰ سطحی کمیٹی قائم کر دی گئی ہے جو تین روز میں ذمہ داروں کا تعین کرے گی۔

وزیر اعظم نے یہ اقدام وزارت مذہبی امور و بین المذاہب ہم آہنگی کی جانب سے سعودی وزارت حج کی 2025 کی حج پالیسی پر بروقت عمل درآمد نہ کرنے پر اٹھایا، جس کے باعث پاکستان پرائیویٹ حج کوٹہ حاصل کرنے میں ناکام رہا۔

انکوائری کمیٹی کے چیئرمین سیکریٹری کابینہ ڈویژن ہوں گے، جبکہ دیگر اراکین میں چیئرمین فیڈرل بورڈ آف ریونیو (ایف بی آر) اور وفاقی سیکریٹری گلگت بلتستان شامل ہیں۔ کمیٹی کو ہدایت دی گئی ہے کہ وہ اس بات کی مکمل چھان بین کرے کہ پرائیویٹ حج پالیسی پر بروقت کیوں عملدرآمد نہیں کیا گیا اور سعودی حکام سے کوٹہ کے حصول کے لیے وقت پر رابطہ کیوں نہ کیا جا سکا۔

وزیر اعظم نے واضح کیا کہ پرائیویٹ کوٹہ نہ ملنے کے باعث ہزاروں پاکستانی شہری اس سال حج کی سعادت سے محروم رہے، جس کی ذمہ داری کا تعین ضروری ہے۔ کابینہ ڈویژن نے کمیٹی کی تشکیل کا باقاعدہ نوٹیفکیشن بھی جاری کر دیا ہے۔

وزارت مذہبی امور و بین المذاہب ہم آہنگی کو کمیٹی سے مکمل تعاون کا پابند کیا گیا ہے تاکہ حقائق پر مبنی رپورٹ جلد از جلد مکمل کی جا سکے۔