وزیراعظم شہباز شریف ورلڈ اکنامک فورم کے سالانہ اجلاس میں شرکت کے لیے ڈیووس روانہ
اسلام آباد: وزیراعظم شہباز شریف منگل کے روز سوئٹزرلینڈ کے شہر ڈیووس کے لیے روانہ ہو گئے، جہاں وہ 20 سے 22 جنوری 2026 تک منعقد ہونے والے عالمی اقتصادی فورم (ورلڈ اکنامک فورم) کے سالانہ اجلاس میں شرکت کریں گے۔
وزیراعظم کے ہمراہ ایک اعلیٰ سطحی وفد بھی ہے، جس میں نائب وزیراعظم اور وزیر خارجہ محمد اسحاق ڈار، وزیر اقتصادی امور احد چیمہ، وزیر اطلاعات و نشریات عطا اللہ تارڑ، وزیراعظم کے خصوصی معاون طارق فاطمی اور دیگر سینئر حکام شامل ہیں۔
اپنے سرکاری دورے کے دوران وزیراعظم اہم سفارتی اور اقتصادی سرگرمیوں میں حصہ لیں گے، جبکہ مختلف ممالک کے سربراہانِ مملکت و حکومت اور بین الاقوامی تنظیموں کے رہنماؤں سے دوطرفہ ملاقاتیں بھی کریں گے۔
دورے کے موقع پر پاکستان اور ورلڈ اکنامک فورم کے اشتراک سے ایک بزنس راؤنڈ ٹیبل کا بھی انعقاد کیا جائے گا، جس میں عالمی کمپنیوں کے نمایاں رہنما شرکت کریں گے۔ یہ رہنما پاکستان میں سرمایہ کاری کے مواقع تلاش کرنے یا اپنی موجودہ سرمایہ کاری کو وسعت دینے میں دلچسپی رکھتے ہیں۔
ورلڈ اکنامک فورم کا سالانہ اجلاس 19 سے 23 جنوری تک “A Spirit of Dialogue” کے عنوان کے تحت منعقد ہو رہا ہے، جس میں مختلف خطوں، صنعتوں اور نسلوں سے تعلق رکھنے والے عالمی رہنما شریک ہوں گے۔ اجلاس میں پانچ اہم عالمی چیلنجز پر غور کیا جائے گا، جن میں متنازعہ دنیا میں تعاون، ترقی کے نئے ذرائع کا فروغ، انسانی وسائل میں سرمایہ کاری، ذمہ دارانہ انداز میں جدت کا استعمال، اور کرۂ ارض کی حدود کے اندر خوشحالی کی تعمیر شامل ہیں۔
