وزیراعظم شہباز شریف کی صدر آصف علی زرداری سے ملاقات، ملکی سیاسی، سلامتی اور معاشی صورتحال پر تبادلہ خیال

اسلام آباد، یورپ ٹوڈے: وزیراعظم محمد شہباز شریف نے منگل کے روز ایوان صدر میں صدر مملکت آصف علی زرداری سے ملاقات کی، جس میں ملک کی مجموعی سیاسی، سلامتی اور معاشی صورتحال پر تبادلہ خیال کیا گیا۔

ملاقات کے دوران دونوں رہنماؤں نے ملک میں امن و امان کی صورت حال اور دہشت گردوں کے خلاف جاری اقدامات پر بھی تفصیلی غور کیا۔ وزیراعظم نے صدر کو معیشت کی بہتری کے لیے حکومت کی جانب سے کیے جانے والے اقدامات سے بھی آگاہ کیا۔

اس موقع پر وزیراعظم اور صدر نے ملک میں استحکام، ترقی اور خوشحالی کو یقینی بنانے کے لیے مل کر کام کرنے کے عزم کا اعادہ کیا۔

ملاقات میں وزیر دفاع خواجہ محمد آصف، وزیر منصوبہ بندی احسن اقبال، وزیر قانون و انصاف اعظم نذیر تارڑ، وزیر داخلہ محسن نقوی اور وزیراعظم کے مشیر برائے سیاسی امور رانا ثناء اللہ بھی موجود تھے۔