چمن دھماکہ: وزیرِاعظم شہباز شریف کی شدید مذمت، جاں بحق افراد کے لواحقین سے اظہارِ تعزیت
لندن، یورپ ٹوڈے: وزیرِاعظم محمد شہباز شریف نے جمعرات کے روز پاک۔افغان سرحد کے قریب چمن میں کار پارکنگ میں ہونے والے بم دھماکے کی شدید مذمت کی، جس کے نتیجے میں چھ قیمتی جانیں ضائع ہوئیں۔
وزیرِاعظم نے جاں بحق افراد کے اہل خانہ سے دلی ہمدردی اور افسوس کا اظہار کرتے ہوئے مرحومین کی بلندیٔ درجات اور لواحقین کے لیے صبرِ جمیل کی دعا کی۔ انہوں نے زخمیوں کی جلد صحت یابی کے لیے بھی دعا کی اور متعلقہ حکام کو ہدایت کی کہ متاثرین کو بہترین طبی سہولیات فراہم کی جائیں۔
انہوں نے حکام کو حکم دیا کہ واقعے کے ذمہ داروں کی فوری نشاندہی کی جائے اور انہیں قانون کے کٹہرے میں لایا جائے۔
وزیرِاعظم نے کہا کہ بلوچستان میں بدامنی پھیلانے والے عناصر صوبے کی ترقی اور خوشحالی کے دشمن ہیں۔ انہوں نے عزم ظاہر کیا کہ ملک دشمن عناصر کو اپنے مذموم عزائم میں کبھی کامیاب نہیں ہونے دیا جائے گا۔
