وزیرِاعظم شہباز شریف کی اقوامِ متحدہ جنرل اسمبلی سے تقریر سب سے زیادہ دیکھی جانے والی ویڈیو قرار

نیویارک، یورپ ٹوڈے: اقوامِ متحدہ کی یوٹیوب چینل پر دنیا کے سربراہانِ مملکت و حکومت کی تقاریر میں سے وزیرِاعظم پاکستان شہباز شریف کا خطاب سب سے زیادہ دیکھا گیا ہے، جسے 26 ستمبر کو اپ لوڈ کیے جانے کے بعد سے اب تک 13 لاکھ سے زائد افراد دیکھ چکے ہیں۔

امریکی صدر ڈونلڈ ٹرمپ کا 23 ستمبر کا خطاب دوسرے نمبر پر ہے، جسے 4 لاکھ 58 ہزار مرتبہ دیکھا گیا، جبکہ تھائی لینڈ کے وزیرِ خارجہ سیہاسک پھوانگ کیتکیاؤ کی 27 ستمبر کو اپ لوڈ کی گئی تقریر 2 لاکھ 77 ہزار سے زائد ویوز کے ساتھ تیسرے نمبر پر رہی۔

وزیرِاعظم شہباز شریف نے اپنے جامع اور وسیع البنیاد خطاب میں غزہ کے تنازع، مسئلہ کشمیر، ماحولیاتی تبدیلی اور عالمی معاشی چیلنجز پر تفصیلی گفتگو کی۔ انہوں نے ان امور کو ایک ایسے پیچیدہ اور غیر مستحکم عالمی منظرنامے کا حصہ قرار دیا جو بڑھتے ہوئے تنازعات، بین الاقوامی قانون کی خلاف ورزیوں اور ماحولیاتی عدم توازن سے دوچار ہے۔

وزیرِاعظم نے اپنے خطاب میں اسرائیلی جارحیت کی سخت مذمت کرتے ہوئے اسے ’’بے گناہ انسانوں کے منظم قتلِ عام‘‘ اور ’’دنیا کے ضمیر پر بدنما داغ‘‘ قرار دیا۔ انہوں نے فوری اور مستقل جنگ بندی پر زور دیتے ہوئے 1967 سے قبل کی سرحدوں پر مبنی دو ریاستی حل کی حمایت کی، جس میں مشرقی یروشلم کو فلسطین کا دارالحکومت تسلیم کرنے کا مطالبہ شامل تھا۔

مسئلہ کشمیر پر بات کرتے ہوئے وزیرِاعظم شہباز شریف نے پاکستان کے مؤقف کو دہراتے ہوئے کہا کہ اس دیرینہ تنازع کا منصفانہ اور پائیدار حل اقوامِ متحدہ کی سلامتی کونسل کی قراردادوں کے مطابق تلاش کیا جانا چاہیے، جو کشمیری عوام کو حقِ خودارادیت فراہم کرتی ہیں۔

انہوں نے بھارت پر غیرقانونی اور یکطرفہ اقدامات کا الزام عائد کیا، جن کے باعث خطے میں کشیدگی میں اضافہ ہوا ہے۔