وزیرِاعظم شہباز شریف کا یومِ جمہوریت پر پیغام
اسلام آباد، یورپ ٹوڈے: وزیرِاعظم محمد شہباز شریف نے کہا ہے کہ پاکستان ایک مرتبہ پھر اس عزم کا اعادہ کرتا ہے کہ عوام، ادارے اور حکومت مل کر جمہوری اصولوں اور بنیادی حقوق کے تحفظ کے ساتھ ایک خوشحال مستقبل کی تعمیر کریں گے۔
یومِ جمہوریت کے موقع پر اپنے پیغام میں وزیرِاعظم نے کہا کہ “جمہوریت دراصل عوام کی آواز اور نظامِ حکومت میں ان کی شمولیت کا نام ہے۔” انہوں نے کہا کہ “پاکستان میں جمہوری نظام کی ترقی میں 1973ء کا آئین کلیدی اور نمایاں حیثیت رکھتا ہے۔”
وزیرِاعظم نے کہا کہ “یومِ جمہوریت ہر سال 15 ستمبر کو اقوام متحدہ کی سرپرستی میں دنیا بھر میں منایا جاتا ہے۔ یہ دن عالمی سطح پر جمہوریت کے نظام کی تنوع اور افادیت پر غور کا موقع فراہم کرتا ہے۔” انہوں نے مزید کہا کہ “جمہوری اداروں میں پارلیمنٹ کو بنیادی حیثیت حاصل ہے کیونکہ یہ ادارہ عوامی اور قومی مفاد کے تحفظ کے لیے ہر نوع کی قانون سازی کا مجاز ہے۔”
انہوں نے کہا کہ “پاکستان کے آئین کے تحت پارلیمنٹ اجتماعی بصیرت کے مطابق عوامی فلاح کے قوانین منظور کرتی ہے جن پر حکومت عملدرآمد کراتی ہے۔ آئین کے آرٹیکل 25 کے مطابق ہر شہری کے بنیادی حقوق کا تحفظ کیا گیا ہے اور سب کو قانون کے سامنے برابری حاصل ہے۔ آئین پاکستان صوبوں کو بھی وفاق میں موثر کردار ادا کرنے کے لیے مساوی حیثیت دیتا ہے۔”
وزیرِاعظم نے کہا کہ “آئین پاکستان نہ صرف بنیادی حقوق کو متعین کرتا ہے بلکہ ان کے تحفظ کی ضمانت بھی دیتا ہے۔ خواتین کی ہر شعبہ زندگی میں شرکت بالخصوص پارلیمنٹ میں نمائندگی کو یقینی بنایا گیا ہے جبکہ اقلیتوں کے حقوق اور مذہبی آزادی کے تحفظ کے لیے بھی خصوصی اقدامات آئین میں شامل ہیں۔”
انہوں نے زور دیا کہ “کسی بھی ملک کے مسائل بنیادی حقوق کے تحفظ، آزادی، مساوات، قانون کی حکمرانی اور قومی یکجہتی کے ذریعے حل کیے جا سکتے ہیں۔ دنیا کا کوئی بھی ملک بنیادی جمہوری اصولوں پر عمل کر کے موجودہ دور کے چیلنجوں کا مؤثر طور پر مقابلہ کر سکتا ہے۔”
وزیرِاعظم نے کہا کہ “پاکستان نے ہمیشہ عالمی سطح پر اقوام متحدہ کے اصولوں اور بین الاقوامی معاہدوں کے تحت جمہوری اقدار کے فروغ اور استحکام کے لیے کردار ادا کیا ہے۔” انہوں نے مزید کہا کہ “پاکستان کی جانب سے جمہوری اصولوں کے فروغ کی حمایت اقوام متحدہ کے پائیدار ترقی کے اہداف (SDGs) کے عین مطابق ہے، جن میں امن، انصاف اور مضبوط اداروں کے تحفظ کو بنیادی اہمیت حاصل ہے۔”
