وزیرِاعظم شہباز شریف کا پیغام: جدید تقاضوں سے ہم آہنگ تعلیمی نظام ہی ملک کے روشن مستقبل کی ضمانت ہے
اسلام آباد، یورپ ٹوڈے: وزیرِاعظم محمد شہباز شریف نے کہا ہے کہ حکومت کی اولین ترجیح تعلیمی نظام کو مؤثر اور عصرِ حاضر کے تقاضوں کے مطابق بنانا ہے تاکہ نئی نسل سائنسی و فنی میدانوں میں دنیا کے ساتھ مسابقت کر سکے اور ملک کا نام روشن کرے۔
عالمی یومِ اساتذہ کے موقع پر اپنے پیغام میں وزیرِاعظم نے کہا، "آج پاکستان دنیا کے دیگر ممالک کے ساتھ مل کر اساتذہ کی قیمتی خدمات کو خراجِ تحسین پیش کر رہا ہے۔”
انہوں نے کہا کہ "دنیا بھر میں اساتذہ کے لیے ایک مخصوص دن منانا نہ صرف پاکستان بلکہ عالمی سطح پر اساتذہ کی خدمات کے اعتراف کا موقع فراہم کرتا ہے۔ اس موقع پر میں حکومتِ پاکستان اور عوام کی جانب سے ملک بھر کے تمام اساتذہ کو دلی خراجِ تحسین پیش کرتا ہوں جنہوں نے تعلیم و تربیت کے میدان میں بے لوث خدمات انجام دیں۔”
وزیرِاعظم نے کہا کہ رواں سال 2025 میں عالمی یومِ اساتذہ کا موضوع "Recasting Teaching as a Collaborative Profession” یعنی تدریس کو ایک اشتراکی پیشے کے طور پر ازسرِنو تشکیل دینا ہے، جس کا مقصد دنیا بھر میں اساتذہ، تعلیمی اداروں اور نظامِ تعلیم کے درمیان ہم آہنگی کو فروغ دینا ہے۔
انہوں نے کہا کہ "صرف بہترین اور جدید تدریسی نظام ہی ملک و قوم کی انفرادی اور اجتماعی صلاحیتوں میں اضافہ کر سکتا ہے اور سرکاری نظام و پالیسیوں میں بہتری کا سبب بن سکتا ہے۔”
وزیرِاعظم نے اساتذہ کے کردار کو سراہتے ہوئے کہا کہ "اساتذہ کسی بھی قوم کی ترقی و عروج میں کلیدی کردار ادا کرتے ہیں۔ ان کی محنت قوموں کے فکری و سائنسی شعور اور تکنیکی استعداد کو جلا بخشتی ہے، جو کسی ملک کی ترقی کی بنیاد ہوتی ہے۔”
انہوں نے مزید کہا کہ "اساتذہ، والدین اور معاشرے کا مثبت و تعمیری کردار نئی نسل کی تعلیم و تربیت کے ذریعے ملک و قوم کی ترقی، خوشحالی اور بہتر مستقبل کی ضمانت ہے۔ اس ضمن میں جہاں اساتذہ اپنی پیشہ ورانہ ذمہ داریاں ادا کر رہے ہیں، وہیں معاشرے پر بھی لازم ہے کہ اساتذہ کے احترام اور عزت میں کوئی کمی نہ آنے دے۔”
وزیرِاعظم نے کہا کہ "اساتذہ کی فنی صلاحیتوں میں اضافہ اور ان کی معاشی بہبود کا خیال رکھنا وفاقی اور صوبائی حکومتوں کی بنیادی ذمہ داریوں میں شامل ہے۔ اساتذہ کے حقوق کے تحفظ کے ساتھ ساتھ ان کی خدمات کی ادائیگی میں سہولت فراہم کرنا بھی حکومت کی اولین ترجیحات میں شامل ہے۔”
انہوں نے کہا کہ "اساتذہ کے حقوق اور فرائض کے تحفظ کے لیے قومی ہی نہیں بلکہ عالمی سطح پر بھی اجتماعی کوششوں اور تعاون کی ضرورت ہے تاکہ اس طبقے کو مزید مؤثر بنایا جا سکے اور دنیا کے روشن مستقبل کی بنیاد مضبوط کی جا سکے۔”
وزیرِاعظم شہباز شریف نے کہا کہ "بین الاقوامی سطح پر مختلف ممالک کے درمیان اساتذہ کے تبادلے اور طلبہ کی بین الاقوامی تعلیمی پروگراموں میں شمولیت ایک خوش آئند عمل ہے جسے مزید فروغ دینا چاہیے۔”
