وزیراعظم شہباز شریف کا عالمی یوم آبادی پر پیغام: متوازن آبادی، باوقار مستقبل کی ضمانت ہے
اسلام آبادعالمی برادری جمعہ کے روز عالمی یوم آبادی منا رہی ہے، اس موقع پر وزیراعظم محمد شہباز شریف نے اپنے پیغام میں کہا ہے کہ موجودہ حکومت ایک جامع، حقوق پر مبنی آبادیاتی ایجنڈے کے لیے پُرعزم ہے، جس کا محور صحت کی مساوی فراہمی، باخبر خاندانی منصوبہ بندی اور ایسے نظام کو مضبوط بنانا ہے جو ہر فرد کو باوقار اور خودمختار فیصلے کا حق فراہم کرے۔
وزیراعظم نے کہا کہ یہ کوششیں پائیدار ترقی کے اہداف (SDGs) اور فیملی پلاننگ 2030 کے تحت پاکستان کی بین الاقوامی وابستگیوں سے مکمل طور پر ہم آہنگ ہیں۔ انہوں نے زور دیا کہ آبادی میں استحکام کے لیے ایک مربوط اور کثیرالجہتی حکمت عملی کی ضرورت ہے۔
انہوں نے کہا کہ اس سال عالمی یوم آبادی کا موضوع — “نوجوانوں کو بااختیار بنانا تاکہ وہ ایک منصفانہ اور پُرامید دنیا میں اپنی مرضی کے خاندان تشکیل دے سکیں” — پاکستان کے آبادیاتی منظرنامے کے لیے خاص اہمیت رکھتا ہے۔
وزیراعظم نے کہا، ’’پاکستان کی آبادی 24 کروڑ 20 لاکھ سے تجاوز کر چکی ہے، جس میں تقریباً 65 فیصد افراد کی عمر 30 سال سے کم ہے۔ ملک اس وقت تاریخ کے ایک اہم موڑ پر کھڑا ہے۔ نوجوانوں کی یہ بڑی تعداد ایک غیر معمولی موقع بھی ہے اور ایک بڑا چیلنج بھی۔‘‘
انہوں نے کہا کہ اگر نوجوانوں کی درست تربیت، تعلیم، صحت اور معاشی خودمختاری پر توجہ دی جائے تو یہی نوجوان قومی ترقی، اختراع اور پیداواریت کی محرک قوت بن سکتے ہیں۔ تاہم، تیزی سے بڑھتی ہوئی آبادی عوامی وسائل اور حکومتی نظام پر بھاری دباؤ ڈالتی ہے، جس سے نمٹنے کے لیے فوری اور مربوط اقدامات ضروری ہیں۔
وزیراعظم شہباز شریف نے وفاقی و صوبائی حکومتوں، ترقیاتی شراکت داروں، سول سوسائٹی، نجی شعبے، مذہبی رہنماؤں اور مقامی برادریوں سمیت تمام اسٹیک ہولڈرز پر زور دیا کہ وہ اس مشترکہ ذمہ داری کو سمجھیں اور آبادی سے متعلق مسائل کے حل میں اپنا بھرپور کردار ادا کریں تاکہ پاکستان کا مستقبل زیادہ صحت مند، خوشحال اور پائیدار ہو۔
