پی ایس ایل کے 11ویں سیزن میں دو نئی ٹیموں کی شمولیت، نیلامی کی تاریخ ایک ہفتے کے لیے بڑھا دی گئی
لاہور، یورپ ٹوڈے: پاکستان کرکٹ بورڈ (پی سی بی) کے چیئرمین محسن نقوی نے پاکستان سپر لیگ (پی ایس ایل) کے 11ویں سیزن میں دو نئی ٹیموں کی شمولیت کے لیے ہونے والی نیلامی کی تاریخ میں ایک ہفتے کی توسیع کا اعلان کر دیا ہے۔ اب یہ نیلامی 22 دسمبر 2025 کو منعقد ہوگی۔
چیئرمین پی سی بی محسن نقوی نے سماجی رابطے کے پلیٹ فارم ایکس پر جاری اپنے بیان میں کہا کہ پاکستان سپر لیگ کی بڑھتی ہوئی عالمی مقبولیت کے پیش نظر بڈنگ کے عمل میں دلچسپی رکھنے والے سرمایہ کاروں کو مزید وقت فراہم کرنے کے لیے نیلامی کی تاریخ میں توسیع کی گئی ہے۔
انہوں نے کہا کہ پی ایس ایل ایک بین الاقوامی سطح پر تسلیم شدہ برانڈ بن چکا ہے اور دنیا بھر سے فرنچائزز کی جانب سے گہری دلچسپی کا اظہار کیا جا رہا ہے۔ نیلامی میں توسیع کا مقصد اس عمل کو مزید شفاف، مؤثر اور مسابقتی بنانا ہے تاکہ لیگ کے مستقبل کو مزید مستحکم کیا جا سکے۔
واضح رہے کہ پی ایس ایل کے 11ویں سیزن میں دو نئی ٹیموں کی شمولیت کے بعد لیگ کے دائرۂ کار اور مسابقت میں نمایاں اضافہ متوقع ہے، جس سے نہ صرف کرکٹ کے شائقین کو مزید دلچسپ مقابلے دیکھنے کو ملیں گے بلکہ پاکستان کرکٹ کو بھی عالمی سطح پر مزید فروغ حاصل ہوگا۔
