وزیراعلیٰ پنجاب مریم نواز کی رمضان نگہبان پیکیج کی منظوری، 42 لاکھ مستحق خاندانوں کو 10 ہزار روپے کی مالی امداد
لاہور، یورپ ٹوڈے: وزیراعلیٰ پنجاب مریم نواز نے رمضان نگہبان پیکیج کی منظوری دے دی ہے، جس کے تحت رمضان المبارک کے دوران صوبے بھر کے 42 لاکھ مستحق خاندانوں کو 10، 10 ہزار روپے کی مالی امداد فراہم کی جائے گی۔
وزیراعلیٰ پنجاب کی زیرصدارت لاہور میں رمضان کی تیاریوں اور عوامی ریلیف سے متعلق ایک اعلیٰ سطحی اجلاس منعقد ہوا، جس میں رمضان المبارک کے دوران نادار طبقے کو سہولیات فراہم کرنے کے لیے مختلف اقدامات کی منظوری دی گئی۔ اجلاس میں فیصلہ کیا گیا کہ حکومت کی جانب سے مستحق افراد کو رمضان نگہبان کارڈ فراہم کیے جائیں گے، جن کے ذریعے کیش کے علاوہ ضروری اشیائے خورونوش بھی خریدی جا سکیں گی۔
اجلاس میں راشن کارڈ، نگہبان دسترخوان، سہولت بازار اور دیگر انتظامی امور کی بھی منظوری دی گئی۔ ضلعی انتظامیہ متعلقہ علاقوں میں گھر گھر جا کر رمضان نگہبان کارڈ فراہم کرے گی۔ کارڈ ہولڈرز بینک آف پنجاب کے برانچ لیس بینکنگ ایجنٹس اور ون لنک نیٹ ورک کے اے ٹی ایمز کے ذریعے کیش حاصل کر سکیں گے، جبکہ بینک آف پنجاب کے مقررہ دکانداروں سے خریداری کی سہولت بھی میسر ہوگی۔
وزیراعلیٰ نے ہدایت کی کہ رمضان نگہبان کارڈ کی ایکٹیویشن کے لیے صوبے بھر میں 136 ایکٹیویشن مراکز قائم کیے جائیں گے، جبکہ کارڈز کو بینک آف پنجاب کے اے ٹی ایمز کے ذریعے بھی ایکٹیویٹ کیا جا سکے گا۔ اس کے علاوہ پنجاب بھر میں راشن کارڈ ہولڈرز کو رمضان کے دوران 3 ہزار روپے ماہانہ کے بجائے 10 ہزار روپے فراہم کیے جائیں گے۔ شفافیت کو یقینی بنانے کے لیے رمضان نگہبان ڈیش بورڈ قائم کیا جائے گا اور کارڈ ہولڈرز کو کال کر کے کاؤنٹر چیکنگ کا نظام متعارف کرایا جائے گا۔
اجلاس میں ہر تحصیل میں رمضان المبارک کے دوران 8 نگہبان دسترخوان اور مریم کے مہمان کے قیام کی بھی منظوری دی گئی۔ نگہبان دسترخوان کے تحت روزانہ 2 ہزار روزہ داروں کے لیے افطار کا انتظام کیا جائے گا، جہاں کھجور، سموسہ، شربت، فروٹ اور چکن بریانی فراہم کی جائے گی۔
رمضان المبارک میں پنجاب کے 30 اضلاع میں 65 سہولت بازار فعال ہوں گے، جبکہ 11 اضلاع میں عارضی رمضان سہولت بازار قائم کیے جائیں گے۔ فری ہوم ڈلیوری کے لیے نگہبان کارڈ کے ذریعے ادائیگی کی سہولت فراہم کرنے کی بھی ہدایت کی گئی۔ سہولت بازاروں میں نرخوں، صفائی، سیکیورٹی اور دیگر امور کی نگرانی کے لیے 1250 کیمرے نصب اور مانیٹرنگ روم قائم کیے جائیں گے۔
وزیراعلیٰ مریم نواز نے رمضان المبارک کے دوران اشیائے ضروریہ کی قیمتوں میں مزید کمی لانے کے لیے اقدامات کی ہدایت کرتے ہوئے کہا کہ فلور ملز، چکن، کریانہ اور گھی ملز ایسوسی ایشن کے اسٹالز بھی قائم کیے جائیں گے۔
اجلاس سے خطاب کرتے ہوئے وزیراعلیٰ نے کہا کہ کوئی بھی مستحق خاندان رمضان المبارک میں خود کو تنہا محسوس نہ کرے۔ انہوں نے کہا کہ غریب عوام کے دکھ سکھ میں حکومت ان کے ساتھ کھڑی ہے اور خدمت کے جذبے سے فرائض انجام دینے سے اللہ تعالیٰ راضی ہوتا اور رزق میں برکت عطا کرتا ہے۔
وزیراعلیٰ نے مزید کہا کہ اللہ کی مخلوق کی خدمت کی ذمہ داری صرف ان کی نہیں بلکہ ہر کمشنر، ڈپٹی کمشنر اور ہر افسر کی ہے۔ انہوں نے ہر ضلع میں نہروں کی بھل صفائی بروقت مکمل کرنے کا حکم بھی دیا، جبکہ سرگودھا میں صفائی کی صورتحال بہتر نہ ہونے پر اظہارِ ناپسندیدگی کرتے ہوئے ڈپٹی کمشنر کو کارکردگی بہتر بنانے کی ہدایت کی۔
