پیٹرول ذخیرہ اندوزوں اور ناجائز منافع خوروں کے خلاف سخت کریک ڈاؤن کا حکم: وزیراعلیٰ پنجاب مریم نواز شریف
لاہور، یورپ ٹوڈے: وزیراعلیٰ پنجاب مریم نواز شریف نے پیٹرولیم مصنوعات کی ذخیرہ اندوزی اور ناجائز منافع خوری میں ملوث عناصر کے خلاف سخت کریک ڈاؤن کا حکم دے دیا ہے۔
وزیراعلیٰ کی ہدایات پر پنجاب انفورسمنٹ اینڈ ریگولیٹری اتھارٹی (پیرا) کو صوبہ بھر میں متحرک کر دیا گیا ہے۔ حکام کو ہدایت دی گئی ہے کہ مصنوعی قلت پیدا کر کے غیر قانونی منافع کمانے والے عناصر کے خلاف سخت کارروائی کی جائے۔
ہدایات کے مطابق ذخیرہ اندوزی یا ناجائز منافع خوری میں ملوث پائے جانے والے پیٹرول پمپس کو فوری طور پر سیل کر دیا جائے گا اور ان کے لائسنس بھی منسوخ کر دیے جائیں گے۔
وزیراعلیٰ مریم نواز شریف نے پیرا کو ذخیرہ اندوزوں کے خلاف زیرو ٹالرنس پالیسی اپنانے کی ہدایت دیتے ہوئے فیلڈ افسران کو صوبہ بھر میں پیٹرول پمپس کی سخت نگرانی یقینی بنانے کا حکم دیا۔
صوبائی حکومت کے مطابق پنجاب انتظامیہ نے مبینہ "پیٹرول مافیا” کے خلاف سخت نفاذی نظام تیار کر لیا ہے۔ حکومت نے واضح کیا ہے کہ خلیجی خطے میں کشیدگی کو جواز بنا کر مصنوعی قلت پیدا کرنے یا عوام کو پریشان کر کے فائدہ اٹھانے کی کسی کو اجازت نہیں دی جائے گی۔
