سینیٹ قائمہ کمیٹی صحت کا اجلاس، ویپس ریگولیشن بل اور میڈیکل داخلہ پالیسی پر تفصیلی غور

اسلام آباد،یورپ ٹوڈے: سینیٹ کی قائمہ کمیٹی برائے قومی صحت خدمات، ضوابط و رابطہ نے منگل کے روز صحت کے شعبے سے متعلق اہم قانون سازی اور پالیسی امور پر غور کیا۔

کمیٹی کا اجلاس سینیٹر امیر ولی الدین چشتی کی زیرِ صدارت منعقد ہوا جس میں نجی رکن کے بل “الیکٹرانک نکوٹین ڈیلیوری سسٹمز (ریگولیشن) بل 2025” پر تفصیلی غور کیا گیا۔

اجلاس کے دوران ارکانِ کمیٹی نے مجوزہ قانون سازی کے پس منظر اور اس کی نیت کو سراہا اور بل کی مختلف شقوں پر تفصیلی تبادلۂ خیال کیا۔ وزارتِ صحت نے کمیٹی کو آگاہ کیا کہ متعلقہ اسٹیک ہولڈرز کی جانب سے اس بل پر بعض اعتراضات اٹھائے گئے ہیں، جبکہ وزارت نے ویپس کے استعمال پر مکمل پابندی کی تجویز بھی پیش کی۔ وزارت کے مطابق یہ آلات منشیات کے استعمال کو فروغ دینے کا سبب بن سکتے ہیں اور مجوزہ بل میں ٹیکس کے معاملات کو بھی مناسب طور پر شامل نہیں کیا گیا۔

غور و خوض کے بعد کمیٹی نے فیصلہ کیا کہ وزارت کی مجوزہ ترامیم کو بل میں شامل کیا جائے اور ہدایت دی کہ آئندہ اجلاس میں ان ترامیم کو شامل کرنے کے بعد جامع بریفنگ پیش کی جائے۔

کمیٹی نے نجی میڈیکل کالجز میں مرکزی داخلہ پالیسی کا بھی جائزہ لیا۔ ارکان نے میڈیکل اینڈ ڈینٹل کالج ایڈمیشن ٹیسٹ (MDCAT) کو دیے گئے 50 فیصد وزن پر تشویش کا اظہار کرتے ہوئے اسے غیر متناسب قرار دیا اور موجودہ داخلہ نظام کا تفصیلی جائزہ لینے کی ضرورت پر زور دیا۔

کمیٹی نے پاکستان میڈیکل اینڈ ڈینٹل کونسل (PMDC) کو ہدایت کی کہ ایم ڈی کیٹ کے ڈھانچے اور اس کے جواز کا ازسرِ نو جائزہ لیا جائے اور اسے بین الاقوامی بہترین طریقہ کار کے مطابق بنایا جائے۔

چیئرمین کمیٹی نے داخلہ فیس مقررہ حد سے زیادہ وصول کیے جانے سے متعلق شکایات کا بھی ذکر کیا اور پی ایم ڈی سی کو ہدایت دی کہ اس حوالے سے کسی بھی خلاف ورزی پر سخت کارروائی کی جائے۔

کمیٹی نے وزارت کو یہ بھی ہدایت دی کہ ملک میں میڈیکل نشستوں کی مجموعی تعداد بڑھانے کے امکانات کا جائزہ لیا جائے۔ چیئرمین کمیٹی نے پی ایم ڈی سی کو یہ تجویز بھی دی کہ ایم ڈی کیٹ کے وزن کو کم کر کے 33 فیصد کیا جائے، 10 فیصد انٹرویو کے لیے مختص کیا جائے جبکہ 57 فیصد وزن میٹرک اور ایف ایس سی کے نتائج کو دیا جائے، اور اس حوالے سے آئندہ اجلاس میں شواہد پر مبنی تفصیلی بریفنگ پیش کی جائے۔

اجلاس میں بیرونِ ملک سے تعلیم یافتہ ڈاکٹروں کے لائسنس کے معاملے پر بھی غور کیا گیا۔ چیئرمین کمیٹی نے پی ایم ڈی سی کو ہدایت دی کہ جو ڈاکٹر نیشنل رجسٹریشن امتحان (NRE) کامیابی سے پاس کر چکے ہیں انہیں مقررہ ضوابط کے مطابق میڈیکل لائسنس کے اجرا میں سہولت فراہم کی جائے۔

کمیٹی نے وزیراعظم کے خصوصی اسکالرشپ پروگرام کے تحت بلوچستان کے طلبہ کے انتخاب سے متعلق یونیورسٹی آف ہیلتھ سائنسز (UHS) کی مبینہ من مانے انتخاب کے معاملے کا بھی نوٹس لیا۔ چیئرمین کمیٹی نے پی ایم ڈی سی کو ہدایت دی کہ اس معاملے کی مکمل جانچ پڑتال کر کے فوری حل یقینی بنایا جائے۔

ایوان کی جانب سے کمیٹی کو بھیجے گئے ستارہ شدہ سوالات پر بحث محرک کی عدم موجودگی کے باعث مؤخر کر دی گئی۔