وزیراعظم شہباز شریف نے موٹرویز اور ریلویز کے ذریعے دہشتگردی اور جرائم کی روک تھام کے لیے کمیٹی تشکیل دیدی

اسلام آباد، یورپ ٹوڈے: وزیراعظم شہباز شریف نے موٹرویز اور ریلویز کے ذریعے ممکنہ دہشتگردی اور جرائم کی روک تھام کے لیے ایک کمیٹی تشکیل دی ہے۔ وزیر دفاع خواجہ آصف کو اس کمیٹی کا چیئرمین مقرر کیا گیا ہے۔

ذرائع کے مطابق، یہ کمیٹی موٹرویز اور ریلوے پولیس کی صلاحیت کا جائزہ لے گی اور دہشتگردی اور جرائم کی روک تھام کے لیے ان اداروں کی کارکردگی کا تجزیہ کرے گی۔ کمیٹی ان اداروں کی استعداد کار کو بڑھانے اور ان کی بہتری کے لیے سفارشات تیار کرے گی۔

کمیٹی اپنی تجاویز دو ہفتوں کے اندر وزیراعظم کو پیش کرے گی۔

اس کے علاوہ، وزیراعظم شہباز شریف نے لاہور میں میری ٹائم سیکیورٹی ورکشاپ سے خطاب کرتے ہوئے کہا کہ پاکستان میں دہشتگردی کے خاتمے کے لیے ان کا عزم پختہ ہے اور دہشتگردی کی لعنت کو ختم کیے بغیر چین سے نہیں بیٹھیں گے۔ انہوں نے کہا کہ پاکستان کی سرزمین سے دہشتگردی کا خاتمہ کرنے کا عزم غیر متزلزل ہے، اور ہماری سیکیورٹی فورسز دہشتگردی کے خلاف روزانہ قربانیاں دے رہی ہیں۔ وزیراعظم نے یہ بھی کہا کہ دہشتگردی کے خلاف جنگ میں 80 ہزار افراد شہید ہوئے اور پاکستان کی معیشت کو 3 ارب ڈالر کا نقصان اٹھانا پڑا۔