دہشتگردی کے خلاف فیصلہ کن جنگ: وزیراعظم شہباز شریف کا عزم

کوئٹہ، یورپ ٹوڈے: وزیراعظم شہباز شریف نے اعلان کیا ہے کہ ملک سے دہشتگردی کا ہر حال میں خاتمہ کیا جائے گا اور دہشتگردوں کے خلاف کسی قسم کی رعایت کا کوئی امکان نہیں ہے۔ انہوں نے اس بات کا عزم ظاہر کیا کہ دہشتگردی کا سر کچل دیا جائے گا۔

کوئٹہ میں ایپکس کمیٹی کے اجلاس سے خطاب کرتے ہوئے وزیراعظم نے کہا کہ دہشتگردوں کا خاتمہ ملک کی ترقی اور خوشحالی کے لیے ناگزیر ہے اور بلوچستان میں امن کے قیام کے لیے ہر فرد کو اپنا کردار ادا کرنا ہوگا۔

وزیراعظم نے دہشتگرد تنظیموں اور گھس بیٹھیوں کی بلوچستان میں ناپاک اسکیموں کا ذکر کرتے ہوئے کہا کہ ان کا خاتمہ ضروری ہے۔ انہوں نے آرمی چیف کی قیادت کی تعریف کرتے ہوئے کہا کہ اس مرحلے کو کامیابی سے عبور کیا جائے گا اور شہداء کی قربانیاں رائیگاں نہیں جائیں گی۔

انہوں نے اس موقع پر بلوچستان میں سول افسران کی تعیناتی سے متعلق نئی پالیسی کا اعلان کیا اور کہا کہ بلوچستان میں قابل اور ہونہار افسران کی تعیناتی ضروری ہے۔ وزیراعظم نے کہا کہ 48 کامن ٹریننگ پروگرام کے افسران کو بلوچستان میں تعینات کیا جائے گا اور ان کو خصوصی مراعات بھی فراہم کی جائیں گی۔

وزیراعظم نے اس بات پر زور دیا کہ بلوچستان کی ترقی کی راہ میں حائل تمام رکاوٹوں کو دور کیا جائے گا اور دہشتگردوں کا صفایا کیا جائے گا۔