وزیراعظم شہباز شریف کی اسٹاک مارکیٹ کی تاریخی کامیابی پر قوم کو مبارکباد

کراچی، یورپ ٹوڈے: پاکستان اسٹاک ایکسچینج (پی ایس ایکس) میں تیزی کی لہر برقرار ہے، جس کے نتیجے میں کے ایس ای 100 انڈیکس میں 1048 پوائنٹس کا اضافہ ہوا اور یہ 89 ہزار پوائنٹس کا سنگ میل عبور کر گیا۔ سرمایہ کاری مالیت میں 97 ارب 54 کروڑ 24 لاکھ روپے کا اضافہ دیکھا گیا، جبکہ 181 کمپنیوں کے حصص کی قیمتوں میں اضافہ ہوا اور 222 کی قیمتوں میں کمی ریکارڈ کی گئی۔

جمعہ کو کاروباری ہفتے کے اختتام پر مارکیٹ 428 پوائنٹس کے اضافے سے کھلی، جس کے بعد دن بھر تیزی کی لہر برقرار رہی۔ ایک موقع پر 100 انڈیکس 1648 کے اضافے سے 90 ہزار پوائنٹس کی حد بھی عبور کر گیا، تاہم آخری دو گھنٹوں میں منافع کے حصول کے لیے کچھ فروخت کی وجہ سے اختتام پر کے ایس ای 100 انڈیکس 1047.98 پوائنٹس کے اضافے سے 88945.99 پوائنٹس سے بڑھ کر 89993.97 پوائنٹس پر بند ہوا۔

وزیر اعظم محمد شہباز شریف نے اسٹاک ایکسچینج کے 100 انڈیکس میں 90 ہزار پوائنٹس کی تاریخی سطح سے تجاوز کرنے پر قوم کو مبارکباد دیتے ہوئے کہا کہ مارچ 2024 سے اسٹاک مارکیٹ میں بتدریج اضافہ سرمایہ کاروں کے حکومتی پالیسیوں پر اعتماد کی عکاسی کرتا ہے۔ انہوں نے مزید کہا کہ بجلی صارفین کے ریلیف کے لیے آئی پی پیز کے ساتھ معاہدوں پر نظر ثانی کا عمل شروع ہو چکا ہے، اور آئندہ چند روز میں معیشت کی بہتری کے حوالے سے مزید خوشخبریاں ملیں گی۔

اس موقع پر، وزیر اعظم نے بتایا کہ اسٹاک مارکیٹ میں مارچ 2024 سے اب تک 36 فیصد اضافہ اور مہنگائی میں کمی کا سہرا معاشی ٹیم کو جاتا ہے۔ انہوں نے بتایا کہ مہنگائی کی شرح 38 فیصد سے کم ہو کر 6.9 فیصد پر آ گئی ہے اور گزشتہ سہ ماہی میں بیرونِ ملک مقیم پاکستانیوں کی جانب سے بھیجی جانے والی ترسیلات زر ریکارڈ 8.8 ارب ڈالر پر پہنچ گئیں۔ اس کے علاوہ، مسلسل دو ماہ سے کرنٹ اکاؤنٹ سرپلس میں رہنے کی خبر بھی خوش آئند ہے۔

ملک بھر میں سونے کی قیمت میں 800 روپے کمی کے ساتھ فی تولہ قیمت 2 لاکھ 82 ہزار 3 سو روپے ہو گئی، جبکہ انٹر بینک میں ڈالر کی قیمت 25 پیسے تک اور اوپن مارکیٹ میں 17 پیسے تک کم ہوئی۔