پنجگور میں سیکیورٹی فورسز کا کامیاب آپریشن، بھارتی حمایت یافتہ تین دہشت گرد ہلاک

کوئٹہ، یورپ ٹوڈے: سیکیورٹی فورسز نے بلوچستان کے ضلع پنجگور میں خفیہ اطلاعات کی بنیاد پر ایک کامیاب آپریشن کیا، جس کے دوران شدید فائرنگ کے تبادلے میں بھارتی حمایت یافتہ تین دہشت گرد ہلاک ہو گئے۔

پاک فوج کے شعبۂ تعلقاتِ عامہ (آئی ایس پی آر) کے مطابق یہ آپریشن بھارتی پراکسی تنظیم فتنہ الہندوستان سے تعلق رکھنے والے دہشت گردوں کی موجودگی کی مصدقہ اطلاعات پر کیا گیا۔ کارروائی کے دوران سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا۔

آئی ایس پی آر کے مطابق ہلاک ہونے والوں میں دہشت گرد کمانڈر فاروق عرف سورو کے علاوہ دہشت گرد عدیل اور وسیم شامل ہیں۔ ہلاک دہشت گردوں کے قبضے سے اسلحہ، گولہ بارود اور دھماکا خیز مواد بھی برآمد ہوا ہے۔ بیان میں کہا گیا کہ یہ دہشت گرد علاقے میں متعدد دہشت گردانہ کارروائیوں میں ملوث رہے ہیں۔

آئی ایس پی آر نے مزید بتایا کہ علاقے میں موجود ممکنہ دیگر دہشت گردوں کے خاتمے کے لیے کلیئرنس آپریشنز جاری ہیں۔ بیان کے مطابق عزمِ استحکام کے تحت دہشت گردی کے خلاف کارروائیاں جاری رہیں گی اور غیر ملکی سرپرستی یافتہ دہشت گردی کے مکمل خاتمے تک آپریشنز کا سلسلہ جاری رکھا جائے گا۔